Sjálfbær þróun og betra skólastarf

Í dag verð ég á ráðstefnu í Brekkuskóla sem skólaþróunarsvið Háskólans á Akureyri gengst fyrir og hlusta á fyrirlestra og erindi. En ég mun líka flytja erindið Hvað felst í menntun til sjálfbærrar þróunar og hvernig getur hún verið þungamiðja skólastarfs?  Útdráttur um erindið er svohljóðandi: Meginhugtök sjálfbærrar þróunar verða útskýrð og farið yfir opinbera stefnu um menntun til sjálfbærrar þróunar, meðal annars sagt frá áratug Sameinuðu þjóðanna. Í síðari hluta fyrirlesturs verður menntun til sjálfbærrar þróunar rædd sem námskrárfræðilegt viðfangsefni - hvaða forsendur eru fyrir því að skapa samfellu sjálfbærrar þróunar og skólaþróunar með námsfléttun (e. infusion) og hvernig sjálfbær þróun tengist starfsþróun kennara sem einn af hæfniþáttum OECD. Í því sambandi verður sagt frá greiningu Rannsóknarhópsins GETU á námskrá leik-, grunn- og framhaldsskóla á Íslandi.

Hefði Margeir mátt nota vörumerki sparisjóðanna?

Eitt sem undrar mig er hvernig MP-banki hefði getað keypt SPRON: átti hann þá að fá að nota vörumerki sparisjóðanna? Ég er hræddur um að mér hefði fundist ég plataður ef svo hefði verið. Byr sem reyndar kallar sig sparisjóð þrátt fyrir breytingar er farinn að nota annað lógó en sparisjóðirnir, þótt hann skreyti sig með því heiti af því að hann vinnur með þeim í greiðslukerfum - eða er það ekki annars?

20. apríl: Mér hefur borist eftirfarandi ábending frá Byr í tölvupósti:

"Við viljum koma á framfæri upplýsingum til þín eftir ummæli þín á bloggi um Byr, að Byr er sparisjóður samkvæmt lögum og starfar í dag sem slíkur. Enda er firmanafnið Byr sparisjóður.

Byr sparisjóður er aðili að Sambandi Íslenskra Sparisjóða (SÍSP) en það eru heildarsamtök sparisjóðanna á Íslandi stofnuð árið 1967. Tilgangur SÍSP er að standa vörð um hagsmuni sparisjóða og styrkja starf þeirra þannig að þeir verði hæfari til að gegna því hlutverki sínu að efla sparnað og stuðla að heilbrigðu efnahagslífi þjóðarinnar. Náin samvinna er með sparisjóðum að uppbyggingu þjónustukerfa í gegnum Teris (áður Tölvumiðstöðvar sparisjóðanna) sem er að stærstum hluta í eigu sparisjóða. Sparisjóðirnir á Íslandi eru 13 talsins og samanstanda af Byr sparisjóði og öllum öðrum sparisjóðum á landinu.

MP banki er hins vegar ekki aðili að Sambandi Íslenskra Sparisjóða og er heldur ekki sparisjóður eins og t.d. Byr sparisjóður. MP banki gæti því ekki notað orðið „sparisjóður“ í sínu kynningarefni en vörumerki sparisjóðanna er einmitt eign sparisjóðanna en ekki MP banka."

Ég þakka ábendingarnar - þarna kemur annars vegar fram leiðrétting á ónákvæmum ummælum mínum um Byr og hins vegar er tekið að MP-banki hefði aldrei getað notað vörumerki SPRON.

MP banki hættir við að kaupa útibú SPRON

Kaup á vændi verða glæpur

Á sama máta og fréttin um álverið er vond þá er þessi frétt gleðileg þar sem hér er ráðist að eftirspurninni og því ofbeldi sem felst í því "kaupa" kynlífs"þjónustu" eins og frjálshyggjupostular hafa stundum nefnt verslun með kynlíf (les verslun með ofbeldi og niðurlægingu kvenna) - og enn afhjúpar Sjálfstæðisflokkurinn sitt rétta eðli í málinu með því að sitja hjá eða greiða atkvæði gegn frumvarpinu. - Það er kannski rétt að bæta við þetta að kaup á vændi voru alltaf glæpur þótt löggjafinn meðhöndlaði þau ekki sem refsiverðan glæp.

Kaup á vændi bönnuð

Sorgleg frétt um álver

Vonandi verður ný ríkisstjórn kröftugri og kemur í veg fyrir meiri álveravæðingu landsins. Vonandi er enn möguleiki á að stöðva þetta álver og þá ekki síður þær virkjanir sem þarf til að það fái raforku.

Lög um Helguvíkurálver samþykkt

Ekki oftar NATO-byssur á Akureyri!

Heyr á endemi! Ég man eftir hávaðanum, og ég reyndar hélt að aðflugsleið úr norðri væri yfir bæinn á Oddeyrinni. Burtu með loftrýmisgæslu NATÓ! Og óþarfa mengun sem fylgir.

Með vélbyssur og flugskeyti yfir Akureyri

Kristján Þór og bæjarstjórnarlaunin

Fyrirspyrjandi úti í sal spurði Kristjáni Þór Júlíussyni fyndist það eðlilegt að þiggja 80 þús. kr. tímakaup fyrir að sitja bæjarstjórnarfundi, en gagnrýna einnig launagreiðslur til Evu Joly vegna rannsókna á mögulegum glæpum sem leiddu til bankahrunsins. Fyrirspyrjandinn velti því að vísu ekki fyrir sér að e.t.v. eyddi Kristján miklum tíma í að undirbúa sig og Kristján svo sem leiðrétti það alls ekki - heldur hélt því fram að hann hefði alltaf unnið vel fyrir Akureyrarbæ. Mátti þannig jafnvel skilja á honum að hann ætti nú bara 80 þús. kr. á tímann skilið, því að hann væri svo frábær !

Nú ætla ég ekki að halda því fram að Kristján hafi ekki unnið langan vinnutíma sem bæjarstjóri eða alþingismaður - ég á miklu frekar von á að hann hafi unnið fyrir kaupinu sínu, þannig séð; ég var og er ósammála áherslum hans og Sjálfstæðisflokksins. Mér finnst hins vegar athugavert að alþingismaður ætli sér líka að sinna störfum bæjarfulltrúa í stóru sveitarfélagi, jafnvel í litlu; varamaður ætti að taka sæti þess situr á þingi. Því að þetta getur komið niður á báðum störfunum sem viðkomandi var kjörinn í. Þessi skoðun er ekki byggð á því að ásaka Kristján sérstaklega - enda er hann ekki eini maðurinn sem hefur setið í þessum sporum. Aðrir, svo sem Árni Þór Sigurðsson og Steinunn Valdís Óskarsdóttir, sögðu af sér sem borgarfulltrúar þegar þau settust á Alþingi.

Segir Steingrím búa í glerhúsi

Auðvitað vildi Sjálfstæðisflokkurinn ekki samkomulag!

Ég er að sumu leyti sáttur við að stjórnarskránni skuli ekki breytt núna. Annars vegar vegna þeirrar afstöðu minnar að það eigi að taka góðan tíma í slíkar breytingar, sérstaklega ef ekki er sátt um þær; hins vegar vegna þess að Sjálfstæðisflokknum tókst að sýna vel einangrun sína við hagsmunagæslu fyrir kvótakerfiskóngana og gegn nútímalegum breytingum á kerfinu. Býst þó við að Sjálfstæðisflokknum finnist þetta sigur fyrir hann - en ég tel aftur á móti að það að meiri hlutinn í þinginu hafi nú bakkað sé til marks um málefnalegan ósigur Sjálfstæðisflokksins í þessu máli.

Stjórnarskrá ekki breytt

Meiri vinna - lægri laun?

Ég fagna yfirlýsingu miðstjórnar Bandalags háskólamanna. Og við hana má bæta til dæmis þeirri staðreynd að margir háskólakennarar þar sem ég þekki til þurfa að vinna umtalsvert meira en þeir kæra sig um - og auðvitað í yfirvinnu, og hluti af ástæðunni er sá að það fæst ekki fólk með þá kunnáttu sem til þarf. Núna til dæmis á að bæta við sumarmisseri og mér skilst að sumir háskólakennarar ætli að leggja fram sjálfboðavinnu við sumarmisserin. Það er gott og blessað - enginn getur bannað að maður fari ekki fram á laun fyrir aukastarf. En það má líka spyrja hvort þá sé ekki einmitt tekið starf sem hefði mátt ráða einhvern annan í - og borga fyrir það kaup. Og fjölga þannig störfum. Þannig bítur þetta nú hvað í skottið á öðru og er ekkert endilega einfalt mál að leysa - en verður betur leyst með samningum við stéttarfélögin en með nokkru öðru móti.

Ósátt við yfirlýsingar um kjaraskerðingu

Vill Sjálfstæðisflokkurinn verja ofurlaun og koma í veg fyrir dreifingu byrðanna?

Sjálfstæðisflokkurinn kastar sannarlega stórum hnullungum úr glerhúsum sínum þegar þingmenn hans gagnrýna ummæli Katrínar Jakobsdóttur í gær, flokkur sem líklegast hafði undirbúið launalækkunarlög áður en hann missti völdin. Ef það er rétt að ummæli Katrínar eigi við "ofurlaun" en ekki við venjuleg taxtalaun, þá ber aftur á móti að skýra það nánar.

Tekist á um skattahækkanir

Nei takk við launalækkun

Fæstir ríkisstarfsmenn nutu mikils af því sem einkageirinn naut meðan hins meinta góðæris naut; því er það rökvilla að halda því fram að fylgja eigi fordæmi þeirra einkafyrirtækja sem ekki fóru um koll en lækkuðu laun (yfirborganir yfir taxta). Ríkisstarfsmenn fá ekki yfir taxta. En eins og ég hef bloggað um áður eru stofnanirnar svo sem að sjá um þetta sjálfar eins og t.d. Háskólinn á Akureyri sem lagði niður bestu störfin með umdeildri ákvörðun í janúar sl. (sjá blogg).

Frekar lækka laun en fækka störfum

Engar launalækkanir opinberra starfsmanna á taxtalaunum

Ég heyrði í morgun að minn ágæti varaformaður, Katrín Jakobsdóttir, hefði rætt að lækka mætti laun opinberra starfsmanna. Væntanlega vill hún þá leggja það til í samningaviðræðum en ekki gera það með lögum eins og þeim sem voru sett á Kjararáð og ég hafði óttast að gamla ríkisstjórnin myndi fylgja eftir með launalækkunarlögum. Ég vil ekki trúa því að frambjóðendur vinstri grænna ætli sér slíkt verði flokkurinn áfram í ríkisstjórn - taka upp arfleifðina frá hinni svokölluðu þjóðarsátt um 1990 þegar brotnir voru kjarasamningar á háskólamenntuðum starfsmönnum. Ég held Katrín og aðrir frambjóðendur verði að skýra þetta miklu betur - eða draga til baka yfirlýsingar af þessum toga. Við þetta má bæta að ef einhvers staðar er greitt yfir töxtum er það allt annað mál, og það á að fara yfir launamálin af sjónarhóli jafnréttis.

Opinber störf eru flest í menntakerfinu og velkerfiskerfinu sem þarf að verja í yfirstandandi kreppu. Kerfin verða ekki varin í slag við okkur sem þar vinnum. En ég lýsi aftur yfir stuðningi við svokallaðan hátekjuskatt, sem reyndar leggst líka á millitekjur.

Frábært mál - aukafjárveiting til námsfólks

Ég fagna aukafjárveitingu til LÍN og er sannfærður um að hún leysir vanda býsna margra á fremur ódýran hátt - sennilega með hagnaði í framtíðinni ef ekki til skamms tíma.

Aukaframlag til LÍN

Blekkingarleikur hvers?

Hver var það sem þáði peninga frá FL Group og Landsbankanum? Var það ekki Sjálfstæðisflokkurinn? Hver er að blekkja hvern? Einar: Setjið þið Sjálfstæðismenn öll spilin upp á borðið: Af hverju ættum við að trúa að það séu engin tengsl milli styrksins frá FL Group og atburðarásarinnar í sambandi við REI? Voru þetta bara venjuleg hagsmunatengsl - kom ekkert sérstakt fyrir þetta?

Einar Kr.: Stunda blekkingarleik

Hvað ætlar þú að gera við peningana sem frúin í Hamborg gaf þér?

SjálfstæðisFLokkurinn er búinn að breyta leiknum gamla um peningana sem frúin í Hamborg í Hvað ætlar þú að gera við peningana sem FL Group og Landsbankinn gáfu þér? Sbr. áskorun Fjölskylduhjálparinnar um að gefa peningana til líknarmála.

Vilhjálmur Þ.: Engir styrkir frá FL Group

Traust til Sjálfstæðisflokksins?

Kannski er fráleitt fyrir okkur sem aldrei höfum treyst Sjálfstæðisflokknum að segja að nú muni traust á honum minnka. En ætli það sé ekki á einhvern hátt sambærilegt við bankahrunið í haust: Að þótt maður vissi vel að bólan hlyti að springa gerði maður sér enga grein fyrir að hvellurinn gæti orðið jafnhár og hann varð. Við vissum vel hversu Sjálfstæðisflokkurinn var hluti af peningavaldinu, en ég a.m.k. gerði mér ekki grein fyrir að hann væri jafn-samansúrraður við það eins og kom í ljós, og ekki heldur að forystumennirnir nánast brytu lög í fjáröflun sinni. Því hvað er það annað þegar tekið er á móti, ekki milljón, ekki fimm milljónum, heldur 30 milljónum fjórum dögum áður en lög um hámarksframlagið 300 þús. frá fyrirtækjum tók gildi. Og ef þetta er ekki lögbrot, eins og framlagið frá Neyðarlínunni sem upp komst um daginn, sem ef til vill hefur má túlka sem lítilfjörlegt lögbrot, sennilega framið í gáleysi, hvað er það þá að sækja féð til FL Group? Samrýmist ekki mínum viðmiðum um heiðarleika. Samrýmist ekki þeim anda laganna að gera framlög gagnsæ og að stórminnka möguleika á beinum hagsmunatengslum og þeim möguleikum að hægt sé að ásaka fyrir mútur. Kannski varð flokkurinn - og formaðurinn fyrrverandi sem vildi ekkert gera á fyrri hluta þessa árs þótt ýmis hættumerki væru honum ljós - á einhvern hátt háður FL Group og Landsbankanum. Ekki þannig að þetta væru beinar mútur endilega - heldur þannig að þessir aðilar gátu kjaftað frá ef að þeim var þrengt. Og það vissi fv. formaður Sjálfstæðisflokksins, sem þýðir lítið fyrir nýjan formann að ætla að fría sig af, þótt hann reyni að halda því fram að við eigum að gleyma þessu.

Allt komið fram sem máli skiptir