Hvalkjöt og markaðssetning

Við þurfum varla að bíða lengi eftir því að Kristján Loftsson svari fyrir sig og bendi á einhverja veikleika í málflutningi Árna. Sem ég er nú hræddur um miðað við þekkingu Árna á þessum málefnum að séu fáir.

Í greininni kemur fram að hvalkjöt sé gefið elliheimilum og leikskólum í Japan, það er stöðum þar sem viðkomandi einstaklingar fá ef til vill takmörkuðu sjálfir að ráða um matseðilinn. Annars dreymdi mig í nótt að einhver væri að plata mig til að borða hvalkjöt. Hvort kjötið í draumnum var langreyðarkjöt eða ekki, það veit ég ekki. En veit að hrefnukjöt fæst í matvörubúðum í flottum umbúðum. Vonandi dettur engum í hug að fara að gabba stofnanir til að kaupa hvalkjöt til að reiða fram í mötuneytum elliheimila og skóla.

Viðbót: Fannar frá Rifi bendir á hér fyrir neðan að hvalveiðar séu náttúrulegar. Því miður er það ekki einhlítt: Þær eru stundaðar á skipum sem nota olíu. Og hvernig er aðferðin við að lóga þeim? Hvað er gert við innyflin sem gera verið býsna stór? Nú er ég að vísu búinn að gleyma sumum þáttum dýrafræðinnar og man ekki nákvæmlega hvað allir hvalir éta. En í millitíðinni eftir að ég gleymdi barnaskóladýrafræðinni lærði ég smávegis í vistfræði, til dæmis það að hvalir eiga það til að vera ofarlega í fæðukeðjunni og þannig margfaldast eiturefni sem því miður eru til staðar í sjónum. Skv. Wikipedia: Aðalfæða hér við land er svifkrabbadýr einkum ljósátan náttlampi. Langreyður étur einnig uppsjávarfisk, loðnu og sílategundir.

Því miður eru útreikningar um hvort hvalveiðar "borgi sig" ekki gerðir eins. Ferðaþjónustan óttast mjög sinn hag ef hvalirnir sem voru sýndir túristum eru veiddir eða fældir á brott.

Segir sölu á hvalkjöti kosta mikið fé

Frjálshyggjan í gervi OECD ekki af baki dottin

Mér heyrast tillögur OECD benda til þess að stofnunin hafi fremur lítið lært af íslenska fjármálahruninu þar sem lítt heft frjálshyggja fékk að ráða yfir bankakerfinu. Við þurfum að byggja upp almannaþjónustuna og fá betri erlend ráð, sem innlend, en við fáum þegar mælt er með meiri einkavæðingu, meiri samkeppni og sjúklingasköttum. (Nú kann að vera að í nýrri skýrslu OECD sé eitt og annað gott en ég hef bara heyrt um viðsjárverð ráð um meiri einkavæðingu, niðurskurð og sjúklingaskatta í heilbrigðiskerfinu, auk ráðs um launalækkun opinbers starfsfólks.)

OECD oflofaði íslenskt fjármálakerfi

Mansal er auðvitað dómsmál

Ég rek augun í það í þessari frétt að aðgerðir gegn mansali verði flutt til dómsmálaráðuneytisins, ef til vill er það þó vegna þess að ráðuneytið verður dómsmála- og mannréttinda. En aðgerðirnar eru brýnar og þótt þær hafi ef til vill beðið vegna annarra brýnna úrlausnarefna eru slíkar aðgerðir hluti af uppbyggingunni eftir hrunið. Sú hugmynd að selja fólk til þrælkunar með ýmsum hætti er auðvitað ekki ný, en hún er líka ný í þeim skilningi að þegar peningar og efnaleg verðmæti eru metin ofar manngildi minnkar líka meðvitund okkar sem tilheyrum almenningi.

Metnaðarfull áætlun á ís?

Skemmtu sér allir vel? Virkilega?

Það væri þá í fyrsta skipti sem allir skemmtu sér vel við nýliðavígslu. Skelfilega hræddur um að blaðamaðurinn viti ekki um þá sem ef til vill þorðu ekki að mæta í skólann eða leið illa en létu ekki aðra finna það hjá sér. Framhaldsskólarnir munu hafa tekið eitthvað á því versta sem hefur liðist, er mér sagt, og ég held sé rétt, a.m.k. flestir, en betur má ef duga skal. Ég vísa á fyrri skrif mín um þetta efni: http://ingolfurasgeirjohannesson.blog.is/blog/ingolfurasgeirjohannesson/entry/609121/

Skrautleg busun hjá Kvennó

Ættum við að fá sérmeðferð?

Bjóst einhver við því að við fengjum einhverja slíka meðferð? Efnahagsmál Íslands eru í það slæmu standi að Evrópusambandið hefur ósköp lítinn áhuga á að gera Ísland að jafnræðislandi sem það verður að vera þótt lítið sé ef það fær inngöngu.

Íslendingar fá ekki flýtimeðferð í ESB

Baráttan um orkulindirnar

Eins og ég hef áður bent á er einkavæðingarliðið ekki af baki dottið þrátt fyrir ófarirnar með bankakerfið og í kjölfar hennar ríkis- eða bankaeignarvæðingu bóksölunnar í landinu og fleiri þátta sem aldrei voru eða þurftu að vera í sameign (reyndar kom fram í fréttum um daginn að fyrri eigendur Tes og kaffis hafa nú keypt þann hluta fyrirtækisins til baka sem seldur hafði verið Pennanum).

Ásælnin í orkulindirnar og heilbrigðiskerfið, kannski menntakerfið, mun eflaust halda áfram. Það er verkefni vinstri grænna í pólitík að standa vörð um almannaþjónustuna - og það verður ekki auðvelt ef hún fer sömu leið og bankakerfið í leit einkaaðila að stórgróða eins og á græðgisárunum.

Raforkukerfið verði í almannaeign

Ánægjulegur fundur á Hvolsvelli :-)

Ályktunin sem hér er bloggað við var ein af mörgum sem var samþykkt á fundinum eða vísað til stjórnar flokksins til meiri úrvinnslu. Meðal annars voru samþykktar ályktanir um orkumál og friðlýsingu Þjórsárvera og Gjástykkis. Sérstaklega var fjallað um mikilvægi þess að fjármálastofnanir verði meðhöndlaðar sem grunnþjónusta sem þarf að vera í eigu almennings (eða að mínum dómi má það veru í eigu samvinnufélaga).

Grunnnetið á ný í eigu þjóðarinnar

Undirbúnings- og yfirferðartími kennara vanmetinn

Í þessum tölum held ég vanti stórlega upp á mat á þeim tíma sem kennararnir verja til undirbúnings annars vegar og yfirferðar á verkefnum og prófum hins vegar. Mikið af þessari vinnu fer fram á kvöldin og um helgar. Helgarnar verða því vinnudagar á starfstíma skóla og teljast því ekki með í tölunni vinna utan starfstíma skóla.

Vinnudagar kennara að meðaltali 174,7

En tjón af því að aka alls konar slóðir merktar á ýmis kort?

Jeppamenn og kortagerðarmenn keppast nú við að bera hönd fyrir höfuð sér vegna skarprar gagnrýni Kolbrúnar Halldórsdóttur fv. alþingismanns og umhverfisráðherra sem birtist í Morgunblaðinu sl. laugardag. Í dag ritar Kristinn Guðmundsson kortaútgefandi grein á bls. 24 þar sem ver rétt til að búa til "rétt kort" af slóðum sem hafi verið einhvers staðar í áratugi. En Kolbrún hafði gagnrýnt að í tölvuvædda kortagrunna væru settar GPS-mælingar af alls konar slóðum sem lægju um friðlönd. Kristinn telur það að birta ekki upplýsingar um slóð í Þjórsárverum væri "fölsun á staðreyndum".

Kristinn tekur fram að hlutverk fyrirtækis hans sé ekki að "ákveða hvar má aka og hvar ekki". Við erum sammála um það. En hann ætti kannski að hugsa sig tvívegis um hvort það sé hugsanlegt að "rétt kort" leiði til þess að einhverjir haldi í góðri trú að þau merki "hvar má aka". Ég gæti auðveldlega dottið í þá gryfju ef ég vissi ekki betur, meðal annars vegna þátttöku minnar í uppbyggingu Vatnajökulsþjóðgarðs þar sem við höfm áhyggjur af því að merkingar á kort hafi í raun leitt til óafturkræfra ákvarðana um "hvar má aka". Og fyrir utan náttúruspjöll sem geta stafað af akstri slóða sem rata á kort hjá kortagerðarmönnum sem búa til "rétt kort", þarf líka að huga að því hvort slóðin er þá merkt eðlilegum öryggismerkingum á kortinu - það er ekki á öllum kortum sem ég hef séð (en tek fram að ég hef ekki skoðað kort Kristins). Þannig getur "rétt kort" orðið býsna hættulegt nema fyrir þá sem eru á best útbúnu bifreiðunum.

Skoðum svo blogg Páls Ásgeirs: http://blog.eyjan.is/pallasgeir/2009/08/25/jeppalaus-thjorsarver. Hann bendir á að það skiptir voðalegu litlu máli þótt einhver hafi einhvern tíma brotist eitthvert á jeppa; það þýði ekki að aðrir megi gerast sekir um þess háttar villimennsku. Og við þetta má enn bæta að þótt einhver hafi rænt verslun eigum við hin að halda áfram að stunda heiðarleg viðskipti.

	Tjón vegna málningarsletta á bifreiðar fæst bætt
Ábyrgðarmaður færslu Tenging við þessa frétt hefur verið rofin vegna kvartana.

Haltu áfram, Gísli

Tillögur Gísla Tryggvasonar, talsmanns neytenda, eru málefnalegar. Vonandi verður á þetta látið reyna - og ég skora á ríkisstjórnina að taka þetta mál upp. Á að bíða eftir því að fólk verði gjaldþrota eða fari í greiðsluaðlögun og þurfi tilsjónarmann? Aðgerðir sem afnema áhrif gengistryggingar lána, að hluta eða alveg, gætu einmitt komið í veg fyrir gjaldþrot. Einnig þarf að huga að áhrifum hækkunar vísitölu á almenn lán.

Það hefur oft verið nefnt að slíkar aðgerðir gætu verið kostnaðarsamar - en er ekki kostnaðarsamara og sársaukafullar að fólk verði gjaldþrota?

Voru gengisbundin lán bönnuð samkvæmt lögum?

Einkavæðingarliðið ekki af baki dottið!

Þrátt fyrir algerlega misheppnaða einka(vina)væðingu bankakerfisins heldur einkavæðingarliðið áfram að ásælast aðrar almannaeignir, í þessu tilviki hitaveitu og rafmagnsframleiðslu auk náttúruauðlindanna. Við höfum einnig orðið vör við einkavæðingartilburði í heilbrigðiskerfinu, svo sem ásóknina í sjúkrahúsið í Reykjanesbæ.

Vilja að stjórnvöld hindri kaup Magma

Vetur eða vegagerð

Í Miðvesturríkjum Bandaríkjanna er gjarna talað um að árstíðirnir séu aðeins tvær: Vetur og vegagerð (construction). Þetta getur alveg átt við hér um þjóðvegina. Hér er lítið hægt að gera við þá á veturna þegar umferðin er minnst heldur verður að vinna þá vinnu á sumrin.

Gleðilegt sprumar!

Kæruleysisleg umræða um fjölda lögreglumanna

Undanfarnar vikur hefur mikið verið rætt um hversu fáir lögreglumenn séu á vakt á höfuðborgarsvæðinu og birtar tölur þar að lútandi. Ég held að það sé nauðsynlegt að ræða hvernig staðið er að löggæslu og einnig um þann aðbúnað og öryggi sem lögreglumenn hafa í starfi. Ég held samt að það sé óþarflega langt gengið þegar kemur í hádegisfréttum útvarps að aðeins svo og svo margir menn séu á vakt á svo og svo stóru svæði með fjölda íbúa. Gæti einhverjum glannanum dottið í hug að iðka hraðakstur? Ég efast alls ekkert um að stjórnendur lögreglunnar skipuleggi störfin vel þannig að glæpir á borð við hraðakstur uppgötvist í tæka tíð jafnt þótt fáir séu á vakt. En hitt er að ég hef ekki hugmynd um hvenær voru fleiri lögreglumenn á vakt, hvort það var 1980 eða 2001 eða hvenær. Getur ekki líka verið að sameining umdæma á höfuðborgarsvæði auðveldi skipulagið?

Stálu ginflöskum

Enn Icesave

Enn er talað um Icesave, alltaf koma upp nýir og nýir fletir. Vonandi er það til góðs að hafa farið svo ofan í saumana á málinu. En er ekki óþarfi að funda til kl. 3 á nóttunni til að byrja svo aftur eftir hádegi? Eða eiga starfsmenn að vinna að undirbúningi núna í morgunsárið með þingmennirnir sofa? Skil ekki alveg það vinnulag að vinna þetta á nóttunni.

Ríkisábyrgðin falli niður 2024

Sýndarmennskan sýnist mér vera Framsóknarflokksins

Það var merkilegt að heyra í formanni Framsóknarflokksins í útvarpinu fyrr í dag þegar hann talaði á kross við sjálfan sig um að þetta væri ómögulegt samkomulag sem hinir flokkarnir fjórir í þinginu gerðu - en það væri nú samt staðfestu Framsóknarflokksins að þakka að þeir hefðu komist að samkomulagi um fyrirvara við Icesave. Kannski ég hef misskilið hann - en ef svo er ímynda ég mér að það hafi fleiri gert.

Þýðingarlaus sýndarmennska