Teigsskóg verður að verja

Teigsskógur á Vestfjörðum er bitbein í umhverfisverndarbaráttunni. Þar á að leggja veg í gegnum fallegan og merkan birkiskóg. Eftir því sem ég kemst næst er um að ræða skammtímavegabætur og e.t.v. nokkrum krónum ódýrari en varanlegri - og styttri - leið með jarðgöngum gegnum hálsa. Hér er því ekki horft langt fram á veg.

Ýmis umhverfisverndarsamtök fjölmenna í Teigsskóg nú um helgina. Á laugardaginn kl. 13 verður lagt verður upp frá Gröf í Þorskafirði þar sem Gunnlaugur Pétursson býður göngufólk velkomið og segir frá áformum Vegagerðarinnar um veglagningu um landnámsskóginn og umhverfisáhrifum hennar. Á áningarstöðum sýna Einar Þorleifsson frá Fuglavernd og Gunnlaugur Pétursson ferðalöngum fugla, blóm og jurtir m.a. ferlaufunginn og krossjurtina sem fundist hafa í skóginum. Ferðin endar í hlaðvarpanum á Hallsteinsnesi þar sem sagt verður frá lifnaðarháttum arnarins sem og einu gjöfulasta arnarhreiðri á landinu sem er að finna í Djúpafirði. Gönguferð um skóginn tekur um þrjár klukkustundir.

Leiðsögn um skóginn er göngufólki að kostnaðarlausu. Skráning í ferðina er hjá Sigrúnu í síma 866 9376 eða [e-mail]

Upplýsingar um svæðið með kortum: www.westfjords.is/index.php/services/listings/C11
(Síðari hluti færslunnar er fenginn af bloggi Dofra Hermannssonar.)

Orsök eða afleiðing?

Spurningin vaknar: Hverjir, úr hvaða starfshópum, eiga að tala í útvarpi og vera í viðtölum? Eru það karlarnir sem nú tapa peningum í stórfyrirtækjunum? Eða konur og karlar sem vinna önnur störf í samfélaginu? Störf þar sem litlum peningum er hægt að tapa, nema launum sem hafa orðið fyrir kjararýrnun.

Að einhverju leyti endurspegla þessi hlutföll valdastöður (stjórnmál, rekstur stórra fyrirtækja) í landinu - en á sama tíma má vel ætlast til þess að fjölmiðlar séu jafnréttistæki, og það hefur sýnt sig að þegar fjölmiðlafólk reynir að fá bæði konur og karla og fólk með fjölbreyttan bakgrunn í viðtöl og þætti að þá tekst það. 

Mun minna talað við konur

Til hamingju

Ég vil óska kollegum mínum í Háskóla Íslands, ekki síst þeim sem störfuðu í Kennaraháskóla Íslands í gær, til hamingju með sameininguna og nýtt upphaf. Eins og aðrir kennarar við Háskólann á Akureyri var ég boðinn í hóf í Háskólatorgi síðdegis í dag þar sem var samglaðst og málin rædd. Ávörp fluttu Kristín Ingólfsdóttir, rektor HÍ, og Ólafur J. Proppé, fráfarandi rektor KHÍ, og fleiri. Það ávarpanna sem vakti mesta athygli mína var ávarp fulltrúa stúdenta við KHÍ en þeirra stúdentaráð mun starfa út bókhaldsárið, eins og það var orðað. Ég tók ekki vel eftir nafninu en af leit á vefsíðu stúdentaráðs KHÍ held ég að það sé Guðmundur Rúnar Ingvarsson sem talaði. Hann minnti okkur á að gleyma ekki akademísku frelsi í sókn eftir að verða meðal þeirra bestu í heimi og að glata ekki sjálfstæði okkar sem einstaklinga í kappinu eftir góðum einkunnum.

Þetta er afar þörf áminning nú þegar aðkoma kennara háskólanna að yfirstjórn þeirra (háskólaráðum) hefur enn verið minnkuð með nýjum lögum sem voru að taka gildi. Þeir sem koma utan frá og ætla að ráðskast með málefni háskóla mega ekki gleyma því að það er einmitt frelsi til rannsókna, þar með talið frelsi til að vinna saman á eigin forsendum, eða hver í sínu horni þegar það á við, er ekki bara lúxus okkar sem störfum þar heldur og helsti möguleiki háskóla til að verða bestur. Stjórnendur stórra fyrirtækja á allt öðrum sviðum, sem sumir hafa sýnt það undanfarið hvernig er hægt að tapa miklum fjármunum: eru þeir líklegastir til að leiða Háskóla Íslands í átt til þeirra bestu í heimi?

Sameining HÍ og KHÍ tekur gildi

Hverjir fá prósentuhækkanir?

Hjúkrunarfræðingar fallast ekki á að fá krónutöluhækkun sem kjararýrnun, eins og formaður Bandalags háskólamanna viðurkenndi að nýgerðir samningar hefðu verið. Aðalsamninganefndarmaður ríkisins heyrðist mér bara staffírugur í því að ekki stæði til boða annað en sú tiltekna krónutala sem BSRB hefði samið um, mér skilst sú sama og Alþýðusambandið og Samtök atvinnulífsins sömdu um. En svo gerðist það sl. föstudag að Samtök atvinnulífsins sömdu við flugumferðarstjóra um circa 8-11% hækkun. Hér er ósamræmi á ferðinni og því er spurt hverjir fái prósentuhækkanir og hverjir megi ekki fá þær.

Strax grafalvarlegt ástand

Kynjahalli í ísbjarnarnefndinni

Athygli mína vakti um daginn þegar umhverfisráðherra skipaði fjóra karla í nefnd til að semja viðbragðsáætlun vegna yfirvofandi ísbjarnarheimsókna. Mikið lá á, því að undir venjulegum kringumstæðum hefur núverandi umhverfisráðherra, Þórunn Sveinbjarnardóttir, verið mjög ströng gagnvart þeim sem tilnefna í nefndir á vegum ráðuneytisins að tilnefna karl og konu svo að ráðuneytið geti kynjajafnað, og ef ekki tilnefndir einstaklingar af báðum kynjum að rökstyðja hvers vegna ekki. Umhverfisráðuneytið mun líka að mér skilst vera eitt þeirra ráðuneyta þar sem kynjahlutfall í nefndum er minnst konum í óhag enda voru forverar Þórunnar á svipaðri línu með tilnefningarnar.

Hver er svo tilgangur þess að tilnefna fólk af báðum kynjum? Hann er margvíslegur, bæði varðar hann aðgang karla og kvenna að völdum og áhrifum, en varðar líka mikilvægi þess að koma ólíkum sjónarmiðum að. Karlarnir í nefndinni eru hins vegar færir; ég veit þetta um suma þeirra af því að ég þekki þá eða þeirra störf, og geri ráð fyrir að það eigi við um þá sem ég þekki minna til. Þeir munu vinna þetta verk vel og leita eftir sjónarmiðum sem máli skipta og safna upplýsingum og gera skynsamlegar tillögur. Þetta á yfirleitt við um nefndir hvort sem þær eru eingöngu skipaðar konum eða körlum, eða fólki af báðum kynjum og á ólíkum aldri. Samt er það þannig að ekki er ólíklegt að karlar og konur upplifi ísbjarnarvána með ólíkum hætti og ég held að umhverfisráðherra hefði vel mátt gefa sér örlítið meiri tíma til að fylgja grundvallarreglunni um hlutföll karla og kvenna í nefndum. Traust mitt til þeirra einstaklinga sem sitja í nefndinni breytir engu um það.

Unnið að viðbragðsáætlun

Magra Ísland - Fagra Ísland

Ég var að lesa góða grein Kristínar Helgu Gunnarsdóttur, ef ég veit rétt stjórnarkonu í Náttúruverndarsamtökum Íslands, um Magra Ísland í Herðubreið, tímariti sem kratar gefa út, þannig að einhverjir í ranni kratanna hafa af þessu áhyggjur. Þórunn úrskurðaði í vor um umhverfismat álversins í Helguvík, þar mætti meta í pörtum. Hvað gerir hún um álverið á Bakka og þær umfangsmiklu framkvæmdir og náttúruspjöll sem af þeim munu hljótast? Leyfir hún að þetta sé bútað niður í margar litlar framkvæmdir sem hver og ein verður metin meinlítil? Hversu magurt getur Fagra Ísland orðið?

Umhverfisráðherra vill ekki fleiri álver

Hvaðan kemur viðbótarorkan?

Verður farið í Gjástykki sem er einn af mikilvægustu stöðum heimsins til að sýna landrekskenninguna í verki? Verður farið í Skjálfandafljót? Eða Jökulsárnar í Skagafirði? Ég tel að framlengd viljayfirlýsing hljóti að merkja þann vilja ríkisstjórnarinnar að útvega orkuna - en merkir hún það að það eigi að útvega orkuna hvað sem það kostar? Ég óttast það - og er langeygður eftir því að sambærileg stefnumótun og fór fram um Vatnajökulsþjóðgarð fari fram um mið- og vesturhluta hálendisins, ekki bíða eftir því að virkjað verði í ofangreindum ám og svo friða það sem orkufyrirtækin vilja ekki.

Beðið er úrskurðar um hvort álverið á Bakka og allar framkvæmdir því tengdar þurfi í mat á umhverfisáhrifum þar sem áhrifin af þessum framkvæmdum eru metin í heild en ekki í pörtum. Framkvæmdaraðilarnir vilja fá að meta hverja og eina framkvæmd - og sleppa undan mati á rannsóknum og vegalagningu vegna rannsóknarborana. 

Krafla veldur óvissu

Fagra Ísland og álver

Jæja, þá er Samfylkingin búin að takast á hendur undirbúning álversins við Húsavík og þrengir þá enn að Fagra Íslandi. Enda þótt þessi yfirlýsing sem slík sýnist að einhverjum hluta vera leiktjöld gefur hún til kynna hvert á að stefna. Hún er því sorglegur atburður.

Álversyfirlýsing undirrituð

Myndirnar eða atburðurinn?

Blaðamannafélag Íslands og umhverfisráðuneytið deila um myndabann af síðara hvítabjarnarhræinu og útskýrir ráðuneytið það þannig að myndataka hafi verið leyfð þegar sýnatöku var lokið. Nú var ég ekki á staðnum og get ekki metið hvort það var óeðlilegt, hefði jafnvel getað verið ímyndarlega klókt að sýna myndir af töku sýna og rannsóknum á dýrinu. Hitt þykir mér verra að í tilkynningu ráðuneytisins er ekki gerður greinarmunur á myndum af fyrra hræinu og þeim atburði þegar fjöldi byssumanna stillti sér upp við hræið með stolt í svip. Það var atburðarásin í fyrra skiptið sem var ógeðfelld en einmitt mjög gott að það voru sýndar myndir af þeim atburði því að ætla má að þær hafi haft áhrif á að fara gætilegar í síðara málinu.

Umhverfisráðuneytið furðar sig á ályktun Blaðamannafélagsins

Þessi ísbjörn var klár - sá næsti á undan var ær

Þessi ísbjörn var klár - sá næsti á undan var ær, jafnvel tvílemba með lömbin fast uppi við sig. En hvað ef "klár" og "ær" eru lýsingarorð? 

- Jamm, það er hægt að brosa að orðaleikjunum í sambandi við ísbjarnarfréttirnar.

Bjarndýrsútkall í Langadal