Mismunandi eftir brautum og háskólum

Þegar spurt er um aðsókn í kennaranám virðist býsna oft spurt um grunnskólakennaranám við Kennaraháskóla Íslands en ekki kennaranám fyrir leikskóla eða framhaldsskóla eða kennaranám í öðrum háskólum, t.d. Háskólanum á Akureyri, sem býður nám til undirbúnings kennslu á þessum skólastigum þremur. Eftirspurn eftir námi í kennslufræði til kennsluréttinda hefur þannig aldrei verið meiri en í ár - ef miðað er við eftirspurn við Háskólann á Akureyri - og þannig virðist mér að svarið við spurningunni í fyrirsögninni sé engan veginn ótvírætt - kannski er það meira að segja "nei" ef grannt er skoðað.

Ein af skýringunum á því umsóknum um grunnskólakennaranám fjölgar ekki getur verið jákvæð fyrir kennarastarfið, það er sú að ungt fólk bíði eftir fimm ára náminu sem hefst haustið 2009. Önnur skýring getur verið sú að ungt fólk - reyndar ungt fólk á öllum aldri - sjái í auknum mæli hag sínum best borgið með að fara í margvíslegt grunnnám (bakkalárnám) í háskóla, jafnvel meistaranám, og bæta við sig kennaranáminu á eftir. Ég hef ekki kannað þetta markvisst en hef samt ástæðu til að gruna þetta.

Varla verður því þó móti mælt, sem fram kemur í fréttinni, að ástæða er til að huga að starfskjörum kennara á öllum skólastigum, einkum og sér í lagi ef okkur sem þjóðfélagi er alvara með að styrkja menntakerfið. Hluti af kjörunum er góð menntun kennara og fjölbreyttir möguleikar til að komast í kennarastarf.

Minni áhugi á kennslu?

Athugasemdir

[Edda Agnarsdóttir, 20.6.2008 kl. 09:59]

Undarlegt að það kom ekki fram í fréttinni að hugsanlega gæti þetta stafað af lengingu kennaranámsins + launa!

Eða kemur lenging námsins ekki til kastanna í vetur?

[Ingólfur Ásgeir Jóhannesson, 20.6.2008 kl. 10:02]

Þetta er ónákvæmt hjá mér í fyrstu útgáfunni:

Fimm ára kennaranám hefst haustið 2009.

[Edda Agnarsdóttir, 20.6.2008 kl. 10:41]

Takk fyrir

[Jón Guðmundsson 21.6.2008 kl. 09:46]

Kæri félagi

Það er orðið allt of langt síðan ég hef náð taki á þér til að þusa svolítið. Hver heldur þú að sé beinlínis að bíða eftir fimm ára náminu? Hver nennir að gutla í fimm ár fyrir þau laun sem í boði eru? Ég er ekkert hissa á að aðsókn að kennaranámi hafi minnkað. Annars hefur verið fróðlegt að fylgjast með auglýsingum háskólanna að undanförnu og baráttu þeirra um hráefnið. Háskólarnir eru jú orðnir það margir að þeir þurfa nemendur, kennararnir þar þurfa vinnu ... þetta er orðinn eins og hver annar iðnaður. Skólarnir markaðsetja sig fyrir fólk á öllum aldri. Nú þykir enginn maður með mönnum nema hann sé í mastersnámi ... nánast á grafarbakkanum. hverju er maður bættari við það að ræða við himnaföðurinn ... verandi með masterinn?

Kær kveðja

Jón G fyrrverandi barnakennari

[Ingólfur Ásgeir Jóhannesson, 21.6.2008 kl. 10:38]

Kæri Jón, alltaf gaman að heyra í þér. Fyrir það fyrsta veit ég alls ekki hvort masterspróf gildir á himnum en einhvern tíma hafði ég það fyrir satt og lærði af barnatrúarfræðum að góð frammistaða í lífinu og ekki alltof mikið kvart og kvabb og væl hefði þó nokkuð að segja á þeim bæ, sálinni til framdráttar.

Við ætlum alls ekki að láta fólk gutla í fimm ár heldur bjóða upp á strangt nám - hvað heldurðu? Nei, ég veit ekki um neinn tiltekinn einstakling sem bíður eftir fimm ára náminu en þegar fjögurra ára grunnskólakennaranámið í KHÍ átti að hefjast haustið 1991, og menntamálaráðherra gaf út fyrirskipun ellefu dögum áður en kennslan átti að hefjast að stytta það aftur í þrjú ár, þá var gerð könnun meðal nema og ef ég man rétt var það um helmingur nema sem var óánægður með styttinguna. Fyrst og fremst vil ég þó setja jákvæðan tón í umræður um kennarastarf, ekki eintómt kvart og kvein undan því að engir hafi áhuga á kennarastarfinu þótt færri sæki um einhverja tiltekna eina af mörgum kennarabrautum í tiltekið skipti.

Bestu kveðjur úr norðlensku sólskini

[Anna Þóra Jónsdóttir, 23.6.2008 kl. 01:01]

Ég hef reyndar þá skoðun að nægilegt væri að bæta við 4. árinu og hafa það nokkurskonar kandidatsár. Kennaranemar væru "ráðnir" ( t.d. á stuðningsfulltrúa/leiðbeinanda-launum) inn í skólana með reyndum kennurum og ynnu með þeim náið heilan vetur og fengju þannig raunverulega sýn á starfið og góða þjálfun fyrir sitt fyrsta sjálfstæða kennsluár ári síðar.(..mér finnst nefnilega nýútskrifaðir kennara fá oft heilmikið sjokk þegar þeir byrja að kenna).

Með þessu myndum við í raun slá tvær (eða fleiri) flugur í einu höggi. Leysa stuðningsfulltrúa/aðstoðarkennara- vandann sem er í skólum víða og veita kennaranemum raunverulega og heildstæða sýn á skólastarfi yfir heilan vetur. Kennaranemarnir kæmu svo inn í kennó 2 á skólaárinu og skiluðu af sér skýrslu og bæru saman bækur sínar um kennsluna.

Einhvern veginn held ég að þarna myndu allir græða + það að ekki þyrfti að byggja neitt við kennó til að koma til móts við aukinn nemendafjölda.

Hvernig lýst þér annars á þessa hugmynd?

[Ingólfur Ásgeir Jóhannesson, 23.6.2008 kl. 12:19]

Best væri, Anna Þóra, að taka upp ólíkar leiðir, t.d. kandídatsár í líkingu við það sem þú lýsir, og þessi hugmynd hefur oft verið rædd og átti að einhverju leyti að styðjast við þessa hugmyndafræði þegar lengja átti námið í fjögur ár 1991. Skotar veita ekki fullgild réttindi fyrr en að loknum reynsluárum, mig minnir að þau séu tvö fremur en eitt. Það er held ég ekki beinlínis kandidatsár heldur reynslutími með minni kennsluskyldu. Umfram allt: Ólíkar leiðir.

[Kristín Dýrfjörð, 23.6.2008 kl. 23:50]

Áhugaverð umræða.