Ertu ekkert á blogginu?

... spurði bloggvinkona sem ég hitti í dag. Sótti í síðustu viku málþing Bandarísku menntarannsóknasamtakanna (AERA) í New York og dvaldi þar fáeina daga til viðbótar. Hélt upp á afmælið mitt um miðja nótt á heimleiðinni í háloftunum.

Það er hins vegar um nóg að blogga: Umhverfisráðherra hefur nú úrskurðað gegn sannfæringu sinni um umhverfismat álvers í Helguvík og tengdra framkvæmda, þ.e. virkjana og raflína. Finnst að þetta sé í raun ein framkvæmd, treystir sér ekki til að úrskurða að svo sé og vill setja lög um að hér eftir verði að meta slíkar tengdar framkvæmdir saman. Hafi ég skilið fréttirnar rétt. 

Hér fyrir norðan vill Alcoa líka reisa álver og við þurfum að krefjast þess að álverið og allar tengdar framkvæmdir verði metin saman. Nú liggja fyrir tillögur að matsáætlunum um virkjun á Þeistareykjum og raflínur þaðan - sett fram sem tvær aðskildar framkvæmdir. Hvorttveggja er þó hluti af forsendum álversins, hluti af umhverfisáhrifum þess, og ætti allt þetta að metast saman.

Athugasemdir

[Kristín Dýrfjörð, 5.4.2008 kl. 00:01]

Kæri Ingólfur, til hamingju með 1. apríl, Bragi minnti okkur hin á daginn í 9 kaffi.

[Anna Ólafsdóttir (anno) 5.4.2008 kl. 00:51]

Gaman að sjá þig aftur hér  Og til hamingju með afmælið. Eigum við þá inni eitthvað með kaffinu? Spyr bara sisona

Ég er nú frekar óhress með þessa álgleði, hélt að tekist hefði að frelsa þjóðina að mestu þegar stækkun álversins í Straumsvík var hafnað - en svo virðist aldeilis ekki vera. Álglýan virðist hafa blossað upp aftur. Sorglegt.

[Ólafur Örn Pálmarsson 5.4.2008 kl. 12:19]

Blessaður Ingólfur.

Ég var að skoða teikningarnar af þessu á heimasíðu Þeistareykja. Mér finnst ótrúlegt að þeir ætli sér að fara inn í Gjástykki fyrir 40MW af orku. Orkugræðginni eru engin takmörk sett og það verðum við að stöðva.

Bestu kveðjur, Ólafur Örn

[Ingólfur Ásgeir Jóhannesson, 5.4.2008 kl. 13:46]

Takk fyrir innlitið, Kristín og Anna - og þú líka auðvitað, Ólafur, og skoðaðu athugasemd á þinni vefsíðu

[Sigrún Jóna 5.4.2008 kl. 15:15]

Ég veit ekki mitt rjúkandi ráð. Er þetta að verða Álland? 

[Anna Karlsdóttir, 5.4.2008 kl. 15:31]

Sæll Ingólfur

Til hamingju með afmælið.  Svo þú ert apríl barn! Varstu búinn að sjá mars-útgáfu National Geography - Þar er athyglisverð grein um Icelandic power struggle og  fínasta mynd af gervigígunum á þínum heimavígstöðvum.

bestu kveðjur frá Hróarskeldu 

[Ingólfur Ásgeir Jóhannesson, 5.4.2008 kl. 17:29]

Takk fyrir innlitið, Sigrún Jóna og Anna ... já, ég er meira að segja 1. apríl-barn! Sá einmitt hólana mína í Rófunum. Við köllum skálarnar í hólunum hveri en vissulega eru þetta gervigígar, en ætli Náttúruverndarráði sem friðlýsti þá undir heitinu Skútustaðagígar hafi ekki þótt Skútustaðagervigígar dálítið snautlegt!

[Anna Karlsdóttir, 5.4.2008 kl. 20:09]

Sammála því Ingólfur, gervigígar eru asnalegt nafn yfir þessi flottu náttúrundur á þinni heimajörð.

[Friðrik Dagur Arnarson 6.4.2008 kl. 20:22]

Sæl Ingólfur.

Það er sorglegt að sjá hvernig virkjunarsinnarnir í Samfylkingunni hafa í raun aldrei sleppt tökunum á stefnu flokksins í nýtingu landsins, þrátt fyrir að heiðarlegir og vel meinandi umhverfissinnar í flokknum hafi verið látnir berja saman plaggið um Fagra Ísland. Því riti sem virðist ekki ætlað til annars en plata menn fyrir kosningar. Ráðherrann er vel meinandi en greinilega í algjörum minnihluta í sínum hópi og hjásvofelsið hjá Sjálfstæðismönnum er þeim sem ráða för meira virði en framsýni og uppbygging til framtíðar. Gjástykki er einfaldlega ein af hinum dýrmætu perlum landsins og með óvenjulega stöðu til að skapa þar merkilega afrek á heimsmælikvarða. Þetta er staðurinn þar sem landrekskenningin sannaðist. Þarna er allt óhemjuvel rannsakað, skráð og myndað og ímynd þessa svæðis er feiknasterk sem gefur færi á uppbyggingu á fræða- og náttúruverndarsvæði sem tækju mörgu mikið fram. Þegar stjórnvöld áður fyrr reru lífróður að fá hingað inn til lands stóriðjufyrirtæki voru menn lítið að hika við að eyða peningum í það. Milljarðar voru nýttir í verkið (man eftir svari við fyrirspurn á Alþingi þar sem sagt var að rúmir 3 milljarðar væru þegar farnir í  verkið og þar af einar 700 milljónir til að liðka fyrir samningum). Engin slík sókn er sett í gang í sambandi við landnýtingu og atvinnusköpun sem  byggist upp kringum umhverfismál, náttúruverndartengda ferðamennsku og vísindarannsóknir. Vilji er allt sem þarf en hann vantar bara. Þessum stjórnvöldum þykir greinilega lítið mál að fórna framtíðarmöguleikum Þingeyinga og annarra Íslendinga fyrir nokkur skitin megavött, enda sjálfsagt búin að lofa einhverjum einhverju í þessu samhengi. Já Fagra Ísland og styrkur stjórnvalda til að takast á við framtíðina eru lítils virði þessa dagana. Því miður, því fagurlega hljómuðu fyrirheitin þó þau reynist nú innantóm og fölsk. 

[Óskar Arnórsson, 7.4.2008 kl. 11:03]

..ég er byrjandi í blogginu..snjallar færslur. Les allt um fjármál þessa stundinna og er fljótur að læra..Guðbjörn bloggari hefur kennt mér mest..

[Ingólfur Ásgeir Jóhannesson, 8.4.2008 kl. 07:40]

Friðrik Dagur og Óskar, takk fyrir innlitið. Og góða punkta frá þér, Diddi.