Leitin lifandi – ný spennandi bók

Um helgina var ég að lesa í bók sem heitir Leitin lifandi – líf og störf 16 kvenna. Bókin er afraksturs samstarfs Kristínar Aðalsteinsdóttur, dósents við kennaradeild HA og deildarforseta, við 15 aðrar fræðakonur sem allar hafa doktorspróf í félagsvísindum og eru háskólakennarar. Í bókinni segja þær lífssögu fræðastarfs síns. Ég hef fengið að fylgjast nokkuð með gerð bókarinnar; ég man reyndar ekki hvenær Kristín, sem í tíu ár hafði skrifstofu við hliðina á minni í húsi kennaradeildarinnar á efstu hæð í Þingvallastrætinu, sagði mér fyrst frá hugmyndinni. Afskaplega ánægjulegt að hugmyndin er orðin að veruleika. 

Í bókinni segir hver og ein kvennanna frá ferli sínum og ýmsum mikilvægum persónulegum æviatriðum sem mótuðu námsval og starfsferil. Höfundarnir eru 16 úr sjö til níu greinum félagsvísinda (eftir því hvernig greinar eru flokkaðar saman), flestar úr menntunarfræðum þar sem fræðasvið höfundanna eru margbreytileg og ólík. Enda þótt ég þekki svo að segja alla höfundana persónulega eða sem kollega í fræðasamfélaginu finnst mér mjög gaman að kynnast þeim betur, líka þeim sem ég hef náið unnið með við HA eða annars staðar sem meira en helmingur hópsins. Í hópnum eru þrjár konur sem kenndu mér í Háskóla Íslands á sínum tíma um og fyrir 1980 og þrjár sem voru skólasystur mínar þar. 

Ætli sé ekki best að setja hér nafnalistann: Sigrún Sveinbjörnsdóttir, Rannveig Traustadóttir, Guðbjörg Linda Rafnsdóttir, Snæfríður Þóra Egilson, Hafdís Ingvarsdóttir, Jóhanna Einarsdóttir,  Kristín Loftsdóttir, Guðný Guðbjörnsdóttir, Guðbjörg Vilhjálmsdóttir, Elín Díanna Gunnarsdóttir, Sigrún Júlíusdóttir, Unnur Dís Skaptadóttir, Kristín Aðalsteinsdóttir, Guðrún Kristinsdóttir, Sigrún Aðalbjarnardóttir og Dóra S. Bjarnason. Við lauslega talningu sýnist mér þær hafa stundað formlegt nám í sjö löndum utan Íslands og stundað rannsóknir í a.m.k. fjórum öðrum löndum. Sumar eru þær frumkvöðlar fræðigreinanna hér á landi, en aðrar á sérsviðum innan greina sinna. Þær hafa því frá miklu að segja sem er ekki bara persónulegt heldur varðar fræðigreinina og tilurð hennar. Í bókinni er gríðarleg reynsla og þekking samandregin á óvenjulegan og frumlegan hátt. Óhætt er að hvetja alla sem áhugasamir eru um þróun íslenskra félagsvísinda að lesa. Háskólaútgáfan gefur út.

Athugasemdir

[Guðmundur Rafnkell Gíslason, 18.12.2007 kl. 14:22]

Kristín Aðalsteins er góð kona, ekkert nema góðar minningar tengdar henni. Ég verð að lesa þessa bók en er reyndar að lesa aðra núna. Takk fyrir sendinguna.

[Anna Ólafsdóttir (anno) 29.12.2007 kl. 14:28]

Ég fékk bókina í jólagjöf og er byrjuð að lesa. Þetta er afskaplega áhugaverð bók og frábært framtak. Ég vil leyfa mér að hvetja fólk til að verða sér úti um bókina.