Nú er ég ánægður með fagfélagið mitt

Mér finnst frábært af Sagnfræðingafélagi Íslands að benda á að skýrsla forsætisráðuneytisins um ímynd Íslands sé á skjön við sagnfræðirannsóknir um uppruna Íslendinga. Hér er tilkynning Sagnfræðingafélags Íslands um bréf sem félagið sendi forsætisráðherra í gær (bréfið er nælt við neðst í færslunni):

"Í viðhengi er afrit af bréfi sent forsætisráðherra frá stjórn Sagnfræðingafélags Íslands. Tilefnið er nýútgefin skýrsla um ímynd Íslands. Skýrslan er afrakstur af starfi nefndar forsætisráðherra en nefndarformaður var Svava Grönfeldt, rektor við Háskólann í Reykjavík.  Í skýrslunni kemur fram að ein af undirstöðum ímyndar Íslands eigi að vera uppruni þjóðarinnar og þá m.a. eftirfarandi þættir í sögu hennar: Fyrstu Íslendingarnir voru fólk sem kom hingað í leit að frelsi og betri lífsskilyrðum. Þjóðin bjó lengstum við kröpp kjör en þegar hún fékk frelsi og sjálfstæði tók hún stökk frá því að vera þróunarland til þess að verða ein ríkasta þjóð í heimi á innan við öld. Íslendingar eru dugleg og stolt þjóð, mótuð af lífsbaráttu í harðbýlu landi. Mikilvægasti menningararfur Íslendinga, íslensk tunga, lifir í máli þjóðarinnar og í bókmenntum hennar.

Sagnfræðingafélagi Íslands finnst rétt að benda á að þessar fáu setningar fela m.a. í sér söguskoðun sem er á skjön við sagnfræðirannsóknir síðustu 30-35 ára. Hún sver sig fremur í ætt við þá söguskoðun sem mótuð var í sjálfstæðisbaráttunni í pólitískum tilgangi. Þeirri söguskoðun hafa fjölmargir sagnfræðingar andmælt síðustu áratugi og komið fram með sannfærandi rök sínu máli til stuðnings. Greina má goðsagnir á borð við frelsisþrá landsnámsmanna og nýja gullöld í kjölfar sjálfstæðis sem voru meðal þeirra sem skapaðar voru til að réttlæta sjálfstæðiskröfuna. Einnig má sjá að nútímahugtök og -viðmið eins og „betri lífsskilyrði" og „þróunarland" eru notuð yfir fortíð þar sem óvíst er að þau hafi haft nokkuð gildi.

Sannarlega er umdeilt hvort ímyndir hafi nokkuð með sannleika að gera. Hins vegar lýsir nefndin því yfir að „[á]rangursrík ímyndaruppbygging þarf að byggjast á einkennum lands og þjóðar sem eru sönn eða „ekta" og eiga sér djúpar rætur."  Ofangreindar staðhæfingar um sögu íslensku þjóðarinnar geta því varla samræmst skilgreiningu nefndarinnar á árangursríkri ímyndaruppbyggingu nema að því leyti að fyrrnefndar goðsagnir eiga sér sannarlega djúpar rætur.

Meðfylgjandi bréfinu er listi yfir áhugaverðar rannsóknir og umfjallanir fræðimanna annars vegar um ímyndir og hins vegar endurskoðunina á þeirri pólitísku söguskoðun sem ríkti á Íslandi fram á 8. áratug síðustu aldar. Það er von Sagnfræðingafélags Íslands að ekki verði litið fram hjá rannsóknum sagnfræðinga og annarra fræðimanna á síðustu áratugum við ímyndarsköpun Íslands á vegum hins opinbera. Jafnframt má benda á að ávallt er hægt að leita til félagsins sem veitir faglega aðstoð eftir bestu getu og er vilji meðal stjórnarmanna að halda fund með fagfólki og fulltrúum nefndarinnar um sagnfræði og ímyndarsköpun."

Bréf þetta er birt á Gammabrekku, tölvupóstlista sagnfræðinga.

Skoðanir í ímyndarskýrslu á skjön við nýjustu sagnfræðirannsóknir

Skrár tengdar þessari bloggfærslu:

• Bréf til forsætisráðherra

Innilegar hamingjuóskir til Margrétar Lindquist

Innilegar hamingjuóskir!  Þetta er glæsilega flaska - fáum við vatn úr henni hér á Akureyri einhvern tíma?

Hlaut viðurkenningu Evrópusamtaka grafískra hönnuða

Vatnajökulsþjóðgarður og "tæknin að stríða okkur"

Ég var viðstaddur þegar Vatnajökulsþjóðgarður var stofnaður sl. laugardag. Við þá athöfn var notuð sú tækni að sjónvarpa um vef ávörpum Þórunnar Sveinbjarnardóttur umhverfisráðherra og Önnu Kristínar Ólafsdóttur formanns stjórnar þjóðgarðsins. Þannig fylgdist ég með því norður í Gljúfrastofu í Ásbyrgi þegar Þórunn undirritaði reglugerðina, stödd í Skaftafelli. Litlu munaði þó að tæknin myndi gera meira en að stríða okkur því að daginn áður munu Öræfingar hafa fengið langþráð þriggja fasa rafmagn. Sem betur fer voru tæknierfiðleikar, sem af hlutust, leystir hratt og lítil sem engin töf á athöfninni.

Þetta er þó bara fyrsta skrefið því enda þótt Vatnajökulsþjóðgarður sé nú þegar stærsti þjóðgarður í Evrópu, eða svo er manni sagt, þá er mikið verk eftir við að stækka þjóðgarðinn. Þannig þarf hann að ná til miklu fleiri svæða kringum jökulinn en enn er orðið, svo sem Jökulsár á Fjöllum (aðeins lítill hluti hennar hefur enn verið friðlýstur) og Langasjávar en Þórunn umhverfisráðherra var vongóð um að hann bættist fljótlega við. Persónulega hlakka ég mest til þess þegar Ódáðahraun og Suðurá hafa verið innlimuð í þjóðgarðinn.

„Stór áfangi í náttúruvernd"

En er búið að semja við JetX sem flýgur fyrir Heimsferðir?

Mér finnst alltaf ánægjulegt þegar kjarasamningur hefur náðst og óska flugfreyjum til hamingju með það. En veit einhver hvort búið er að semja við félagið JetX (eða heitir félagið Primera Air?) sem flýgur fyrir Heimsferðir? Síðast þegar ég las um samningamál flugfreyja var félagið ekki á þeim buxunum að gera kjarasamning við Flugfreyjufélag Íslands.

Flugfreyjur semja við Iceland Express

Ályktun SUNN um ísbjarnardrápið

SUNN, Samtök um náttúruvernd á Norðurlandi hafa sent frá sér ályktun sem hljóðar svo: "SUNN, Samtök um náttúruvernd á Norðurlandi, harma ísbjarnardrápið í Skagafirði í gærmorgun sem virðist ekki hafa verið sérlega vel ígrunduð ákvörðun. Af fréttum að dæma og frásögnum sjónarvotta er ósennilegt að slík hætta hafi verið fyrir hendi að ekki mætti bíða útbúnaðar til að fanga ísbjörninn. Ísland er aðili að fjölmörgum alþjóðasamþykktum um dýravernd og líffræðilegan fjölbreytileika og þessar samþykktir leggja okkur skyldur á herðar að drepa ekki dýr í útrýmingarhættu. Ef sú hætta stafar af ísbjörnum, sem látið er af, er það aftur á móti sinnuleysi af stjórnvöldum að ekki skuli vera til aðgerðaáætlun því að ísbirnir koma til landsins öðru hverju. Vonandi verður slík aðgerðaáætlun gerð í kjölfar þessa atburðar og fagna ber þeirri yfirlýsingu umhverfisráðherra að farið verði rækilega yfir atburðarásina í gær." Undir þetta ritar stjórn SUNN, 4. júní 2008".

Einmana og villtur hvítabjörn

Varnarmálastofnun óþörf

Mér sýnist Varnarmálastofnun gersamlega óþörf úr því að norðlenskar skyttur duga til að verjast árás ísbjarnarins.

„Hefði átt að loka veginum"

Grænfánaskólum á Norðurlandi fjölgar

Í gær vorum við Eygló Björnsdóttir hérna hinum megin við fjörðinn á vegum Landverndar til að afhenda tveimur skólum, Álfaborg og Valsárskóla, svokallaðan grænfána. Hann er veittur fyrir árangur í umhverfismálum. Skólarnir vinna að því um tveggja ára skeið að fá grænfána. Skipuð er umhverfisnefnd í skólanum og lögð mikil áhersla á þátttöku nemenda. Það kom greinilega fram í gær í Valsárskóla þegar nemendur kynntu verkefnið.

Athöfnin í gær var þannig að fyrst fékk Álfaborg grænfánann sinn með viðeigandi útskýringum og ræðuhöldum (mjög stuttum). Skjal er á ensku til að leggja áherslu á að með móttöku grænfána komst skólinn í hóp þúsunda skóla í fjölda landa. Nemendur í umhverfisnefnd tóku við fánanum. Og auðvitað var fáninn dreginn að húni. Viðstaddir voru kennarar, nemendur og starfsfólk Álfaborgar og Valsárskóla, auk fjölmargra íbúa Svalbarðsstrandar. Síðan var gengið yfir að Valsárskóla, sem er á sömu lóð, flutt stytt útgáfa af ræðunum, nemendur í umhverfisnefnd fengu fánann afhentan, og hann dreginn upp nýja fánastöng. Að lokum var kynning nemenda og veisla þar sem á boðstólum voru pylsur og kökur.

Á annað hundrað skólar á landinu hafa nú fengið grænfána eða vinna að því að fá hann, sbr. heimasíðu Landverndar. Átta skólar á Norðurlandi fá grænfána í fyrsta eða annað skipti nú í vor.

Það er afar ánægjuleg reynsla að fá að afhenda grænfána, eins og ég hef tekið að mér í fáein skipti, og taka með því þátt í hátíðarstund í skólanum sem fær grænfánann.

Þjótandi á Þjórsárbökkum

Mér hefur borist eftirfarandi fréttatilkynning frá Áhugahópi um umhverfis- og samfélagsmál í Flóahreppi:

"Viltu sjá fallegan stað við Þjórsá? Viltu standa hjá landnámsskála frá því fyrir 1000? Viltu sjá fyrirhugað stíflustæði Heiðarlónsstíflu? Hvað sérðu? Hvað sést ef virkjað verður?

Áhugahópur um umhverfis- og samfélagsmál í Flóahreppi efnir til skoðunar- og fræðsluferða í landi Þjótanda að fornminjauppgreftri á bakka Þjórsár, en fornminjarnar lenda undir Heiðarlónsstíflu fari svo að Urriðafossvirkjun verði að veruleika. Þetta er stutt ganga á árbakkanum en margs að njóta. Vonandi verður líka hægt að selflytja fólk sem ekki getur gengið, á þar til gerðum ökutækjum. Við uppgröftinn verður miðlað fróðleik um minjarnar sem þar hafa fundist, en sennilega er eitt húsanna sem rannsökuð hafa verið byggt nokkrum áratugum eftir árið 871. Svo má taka með sér nesti og og njóta þess úti í náttúrunni.

Gengið verður föstudaginn 30. maí, laugardaginn 31. maí og sunnudaginn 1. júní, alla dagana kl. 18:00. Upphaf ferðarinnar er á gömlu brúnni yfir Þjórsá, en til að komast á hana er ekinn vegur merktur Heiðarbær / Skálmholt skammt vestan árinnar og Urriðafossvegar. Allir velkomnir.

Ferðirnar eru farnar á sama tíma og sveitarhátíðin Fjör í Flóa er haldin, en meirihluti undirbúningshóps hátíðarinnar taldi viðburðinn vera pólitískan áróður og hafnaði því að hann fengi að vera með á dagskrá hátíðarinnar."

Mér finnst þetta síðasta alveg ótrúlegt - en vekur kannski meiri athygli á göngunum.

 

Orkuskortur??

Iðnaðarráðherra hefur áhyggjur af orkuskorti í kjölfar álits Skipulagsstofnunar um Bitruvirkjun. Við Moggann í dag segir hann: „Það er ljóst að erlend stórfyrirtæki hafa áhuga á að setja upp framleiðslu hér á landi, mengunarlausa en orkufreka stóriðju, sem hugsanlega myndi skapa bæði verðmæti og störf. Við þá stöðu sem núna er komin upp gæti slegið í bakseglin“.

Hvernig getur orðið orkuskortur ef hugsað er um allar þær virkjanir sem unnið er að? Jú, einmitt út af því að það hafa verið gerðir samningar við álver sem í raun og veru eru ekki sérlega atvinnuskapandi miðað við þá orku sem álverið þarf. Það er í raun lítil orka í landinu og aldrei pláss fyrir álverin sem unnið er að, hvorki af náttúruverndar- né loftslagsástæðum.

Skortur á orku getur orðið vandamál

Falleinkunn fyrir Bitruvirkjun

Skipulagsstofnun hefur birt álit sitt um Bitruvirkjun og ég vísa hér á blogg Láru Hönnu. Það er mikið fjallað um þetta annars staðar, meðal annars á vef RÚV þar sem forstjóri Orkuveitu Reykjavíkur lætur í ljós þá skoðun að hér eftir verði erfiðara að reisa jarðvarmavirkjanir - en ég spyr hvort ekki sé  nóg komið nú þegar þannig það væri bara ágætt, því að við erum að berjast gegn virkjanafárinu hér fyrir norðan. Nú reynir á Orkuveitu Reykjavíkur og hvort Sjálfstæðisflokkurinn og Frjálslyndi flokkurinn muni samt halda áfram því að leyfisveitendur virðast lítið gera með álit Skipulagsstofnunar, sbr. Dettifossveg þar sem gengið er gegn álitinu og Úrskurðarnefnd skipulags- og byggingarmála staðfestir leyfi Skútustaðahrepps.