Þjótandi á Þjórsárbökkum

Mér hefur borist eftirfarandi fréttatilkynning frá Áhugahópi um umhverfis- og samfélagsmál í Flóahreppi:

"Viltu sjá fallegan stað við Þjórsá? Viltu standa hjá landnámsskála frá því fyrir 1000? Viltu sjá fyrirhugað stíflustæði Heiðarlónsstíflu? Hvað sérðu? Hvað sést ef virkjað verður?

Áhugahópur um umhverfis- og samfélagsmál í Flóahreppi efnir til skoðunar- og fræðsluferða í landi Þjótanda að fornminjauppgreftri á bakka Þjórsár, en fornminjarnar lenda undir Heiðarlónsstíflu fari svo að Urriðafossvirkjun verði að veruleika. Þetta er stutt ganga á árbakkanum en margs að njóta. Vonandi verður líka hægt að selflytja fólk sem ekki getur gengið, á þar til gerðum ökutækjum. Við uppgröftinn verður miðlað fróðleik um minjarnar sem þar hafa fundist, en sennilega er eitt húsanna sem rannsökuð hafa verið byggt nokkrum áratugum eftir árið 871. Svo má taka með sér nesti og og njóta þess úti í náttúrunni.

Gengið verður föstudaginn 30. maí, laugardaginn 31. maí og sunnudaginn 1. júní, alla dagana kl. 18:00. Upphaf ferðarinnar er á gömlu brúnni yfir Þjórsá, en til að komast á hana er ekinn vegur merktur Heiðarbær / Skálmholt skammt vestan árinnar og Urriðafossvegar. Allir velkomnir.

Ferðirnar eru farnar á sama tíma og sveitarhátíðin Fjör í Flóa er haldin, en meirihluti undirbúningshóps hátíðarinnar taldi viðburðinn vera pólitískan áróður og hafnaði því að hann fengi að vera með á dagskrá hátíðarinnar."

Mér finnst þetta síðasta alveg ótrúlegt - en vekur kannski meiri athygli á göngunum.

 

Athugasemdir

[svarta, 28.5.2008 kl. 09:19]

ég er að hugsa um að skella mér.

annnars langar mig að benda þér á skemmtilega frétt á mbl.is sem segir frá Claudio Gratton, Háskólanum í Wisconsin, við rannsóknir í Höfðva við Mýtvat.

ég hef aldrei komið í þennan Höðva. Er hann nálægt Vöðva?

kveðja, K

[Ingólfur Ásgeir Jóhannesson, 28.5.2008 kl. 15:11]

Höfði er á Hafurshöfða, byggður úr Kálfaströnd. Og skammt undan eru Geitey og Hrútey. Allt fullt af dýrum. Annars segjum við Mývetningar "höbbði"

Sjáumst kannski við Þjórsá á sunnudaginn?

[svarta, 28.5.2008 kl. 21:20]

jú jú ég hef auðvitað komið í Höfða og átt ánægjulega 17. júnía.

En ég hef aldrei komið í HöðVa eins og stóð á mbl eða MýTVAT :)

jú jú ég mæti.