Einkavæðing löggæslu gegnum fjársvelti lögreglu?

Fréttir berast nú af því að sveitarfélög ætli sér að semja við einkafyrirtæki um öryggisgæslu í hverfum og nýlega voru ráðnir "miðborgarþjónar" í Reykjavík. Og í gær var á forsíðu Mogga að aðeins 14 lögreglumenn hefðu verið á vakt á höfuðborgarsvæðinu um helgina - vegna fjárskorts.

Hér er að mörgu að hyggja: Dagur B. Eggertsson fv. borgarstjóri sagði í RÚV í morgun að hér gæti orðið um falskt öryggi að ræða, hverfagæslan verði ekkert það góð. Um það má eflaust deila en samt er þetta augljós fyrirvari sem verður að setja. Og hverfagæslan kostar peninga úr sveitarsjóðum sem ætti að kosta úr ríkissjóði. Eitthvað annað mun víkja úr þjónustu sveitarfélaganna, hvort það verða skólamál eða menningarmál eða aðhlynning aldraðra sem þurfa aðstoð til að geta búið sem lengst heima hjá sér. Sveitarsjóðir standa margir hverjir mishöllum fæti - og verður þá minni löggæsla og hverfagæsla í þeim verr stæðu? Einkaöryggisgæslan er ekki æskileg þróun í ljósi fjársveltis til lögreglunnar.

Hverfagæsla boðin út

Athugasemdir

[Rósa Harðardóttir, 17.7.2008 kl. 21:34]

Hvaða áhrif hefur þetta á störf lögreglunar og hvað segja þeir um þessa "gæslu"? Er ekki verið að seilast inn á grátt svæði.

[Anna Karlsdóttir, 18.7.2008 kl. 00:57]

Sæll Ingólfur

Ég átti leið um þingholtin í Reykjavík um dagin og sá þá í fyrsta skipti vegskilti sem á stóð nágranna vöktun (eða eitthvað á þann bóginn). Þetta er í fyrsta skipti sem ég hef séð þetta hér utan í Ameríku þar sem að skiltið neighbour watch er ekki óalgengt. Það er greinilega hægt að virkja á mismunandi sviðum gegn glæpum. 

[Ingólfur Ásgeir Jóhannesson, 18.7.2008 kl. 09:22]

Mig minnir að einhver af yfirmönnum lögreglunnar léti í ljós velþóknun á hverfagæslu á vegum öryggisfyrirtækja, ég skil ekki hvers vegna. Kannski blandað henni saman við nágrannagæslu sem allt, allt öðruvísi fyrirbrigði, samantekin ráð íbúa.

[Friðrik Dagur Arnarson 18.7.2008 kl. 09:35]

Það er sorglegt að sjá hvernig sjálfstæðisflokkurinn sveltir ýmsa þætti opinberrar þjónustu markvisst til að geta haldið því fram í flokksblöðunum sínum að  allt sé í voða og verði að einkavæða. Þá eru til peningar. Það virðist ekki skipta þetta lið minnsta máli að einkavæðing leiðir mjög oft til lakari og minni þjónustu og aukins kostnaðar fyrir neytendur og samfélag vegna þess að þjónustan er ekki lengur markmiðið heldur sá gróði sem einkaaðilinn er að sækja sér. Auk þess er oft minna hugað að lögum og reglum. Um þetta eru ótal dæmi í heilbrigðis og félagsþjónustu, sorpinu, samgöngum og víðar. En ef "rétta" liðið fær þetta mun það launa bláu höndinni og tryggja áframhaldandi stöðu hennar í kverkatakinu um samfélagið. Og þetta kýs þjóðin yfir sig aftur og aftur í fullkomnu meðvitundarleysi um eigin hagsmuni og velferð allra landsmanna. Merkilegt!

[Ingólfur Ásgeir Jóhannesson, 18.7.2008 kl. 22:48]

Enda er einkavæðingin hugmyndafræðilegs eðlis en ekki af rekstrarlegum ástæðum. Eða er hún einkavinavæðing eingöngu, óviðkomandi stjórnmálahugsjónum?