Ekið fyrir Skaga

Ég ók fyrir Skaga í sumar sem auðvitað er ekki í neinar sérstakar frásögur færandi nema að ég hafði aldrei komið norðar en til Blönduóss, Húnaflóamegin, og aldrei norðar en Sauðárkróks, austanmegin á Skaganum. Fyrst og fremst var þetta ökuferð í góðu veðri til að njóta landslagsins - en ekki vegarins sem er malarvegur frá Skagaströnd að vestan og að nýjum vegi yfir Þverárfjall, 16 km norðan Sauðárkróks - og sums staðar mjór - en maður kemst þetta nú á hvaða bíl sem er ef ekið er á skynsamlegum hraða.

Mest á óvart kom Kálfshamarsvík, útgerðarstaður frá fyrri hluta síðustu aldar og fór í eyði fyrir ca 70 árum. Hann er Húnaflóamegin. Þar er búið að koma upp ýmsum upplýsingum og merkja stuttar gönguleiðir og jafnvel búið að koma upp hreinlætisaðstöðu. Höfn frá náttúrunnar hendi og falleg náttúra, og viti. Kjörinn áfangastaður, a.m.k. í jafngóðu veðri. T.d. hægt að setja niður og borða nestið sitt.

Minna kom á óvart hvað Skagaströnd er glæsilegt byggðarlag.

Eitt fór í pirrurnar á mér eftir að hafa ekið og notið náttúru og útsýnis: Norðan á Skaganum var stórt svæði þar sem búið er að planta lúpínu og eftir að hafa ekið í gegnum lúpínulaust svæði langa leið stakk þetta gríðarlega í augu. Mig minnir þetta heiti Ásbúðir. Enn sem komið er sýndist lúpína vera að mestu innan girðingar - en ég held að hún virði ekki girðinguna, enn síður en túnrollur. En kannski má beita fé í þetta áður en lengra fer.

Ísland úr NATÓ - Magma á braut

Jónas Kristjánsson heldur því fram að ríkisstjórnin geti hafnað Magma-samningi á þeirri forsendu, að Ross Beaty sé „lélegur pappír. Reki mannfjandsamlegan námurekstur í Suður-Ameríku. Eða á þeirri forsendu, að kjörin séu rugl. Mest sé lánað út í hönd með kúluláni á lágum vöxtum með veði í bréfunum sjálfum. Eða á þeirri forsendu, að skúffa í Svíþjóð sé ekki traust heimilisfang.“ Og hann bendir líka á að „Ross Beaty og skúffan í Svíþjóð hafi enga þekkingu á jarðhita.“ Hann afþakkar „sjónhverfingar“ og „lukkuriddara“. Burtu með einkaeign á auðlindum, alveg sama þótt það sé kallað "nýtingarréttur".

Rifti samningum við Magma

Á hvaða tungumáli?

Miðað við fréttir af tungumálaerfiðleikum Jóns Ásgeirs þá vaknar einfaldlega þessi spurning, sjá t.d. fyrra blogg.

Segist ætla í mál við Steinunni

Sniðganga gagnvart ísraelskum vörum

Félagið Ísland-Palestína hvetur okkur til þess að sniðganga vörur frá Ísrael til að gera þessu hernámsríki sem kúgar palestínumenn erfiðara fyrir. Á heimasíðu félagsins kemur fram að ávextir, krydd, málbönd og hallamál frá Ísrael eru meðal þess varnings sem er fluttur inn og seldur í verslunum hér á landi. Einnig kemur fram að vörur með strikamerkisnúmeri sem byrjar á 729 eru framleiddar í Ísrael. Það kemur einnig fram að ýmis konar fjarskiptabúnaður og hugbúnaður er framleiddur í Ísrael, meðal annars er ég mjög spældur yfir því að upplýsingakerfið gegnir.is er hannað af ísraelsku fyrirtæki. Svo kemur líka fram að landránsfólkið sem hefur byggt sér ísraelskar byggðir innan um byggð palestínumanna á Vesturbakkanum merkir stundum vörurnar sem palestínska framleiðslu. Sjá heimasíðuna http://www.palestina.is/upplysingar/ekki-kaupa-israelskt/

Enskukunnátta Jóns Ásgeirs

Enskukunnátta Jóns Ásgeirs Jóhannessonar og fleiri sem reynt er að ná böndum yfir eftir meinta pretti og svik í íslensku fjármálakerfi er nokkuð til umhugsunar og umræðu þessa dagana eftir að þeir reyna að komast undan réttvísinni í Bandaríkjunum á þeirri forsendu að þeir hafi ekki kunnáttu í enskri tungu. (Skilur nú enginn hvað þeir voru að þvælast í viðskiptum í enskumælandi löndum eða yfirleitt að fara út fyrir landsteinana.) En hvað: Hvers konar íslensku töluðu útrásarvíkingarnar?

Jón Ásgeir metur eignir sínar á 240 milljónir

Talsmenn líffræðilegrar fábreytni

Guðmundur Andri Thorsson, rithöfundur, dregur lúpínista sundur og saman í háði í grein í Fréttablaðinu í dag (bls. 15). Vísar til orða Jóns Loftssonar, skógræktarstjóra, sem Guðmundur gefur titilinn "ákafasta talsmann líffræðilegrar fábreytni hér á landi og þess að landið sé lúpínu vaxið milli fjalls og fjöru" um að hann léti sér í léttu rúmi liggja þó lúpína myndi eyða berjalyngi á stórum svæðum. Lyngið er nefnilega, að mati Jóns, síðasta stig gróðurs á undan algerri gróðureyðingu, það sé frumstætt. Guðmundur líkir svo lúpínunni og hegðun hennar gagnvart öðrum plöntum við hegðun Baugskeðjuverslana og annarra þess hátta keðja sem útrýma hverfisverslunum.

Alþjóðlegt orgelsumar í Hallgrímskirkju

Ég fór í hádeginu í dag á dásamlega orgeltónleika í Hallgrímskirkju - danskur orgelleikari sem líka spilar kl. 17 á morgun. Þetta er hluti af alþjóðlegu orgelsumri. Mér sýnast vera tónleikar kl. 12 þrjá daga í viku í kirkjunni: Schola Cantorum á miðvikudögum, íslenskir orgelleikari á fimmtudögum, oftast erlendur orgelleikari á laugardögum sem svo spilar líka á sunnudögum kl. 17. (Hallgrimskirkja.is).

Ísbjörninn hans Jóns?

Snjallt hjá Jóni Gnarr - úr því að Birna kemur í ráðhúsið sem forseti þarf ekki ísbjörn í húsdýragarðinn. Auk þess er fyrirsögn fréttarinnar "Hann Birna" sem líkast til verður nú leiðrétt innan stundar. Minnir á fyrirsögnina "Dagur Jóns".

Vísir: Hanna Birna þiggur embættið

Harðari siðferðisdómar gagnvart konum?

Ég velti alvarlega fyrir mér hvernig stendur á því að það er forsíðufrétt og á bls. 2 dögum saman (t.d. Fréttablaðið í dag) að kona, fjármálastjóri Orkuveitu Reykjavíkur, fékk NOTAÐAN bíl sem hluta af starfskjörum sínum. Reyndar skil ég ekki hvers vegna þarf að sjá forstjórum og fjármálastjórum fyrir ökutækjum. Ég skil að sendill fyrirtækisins þurfi afnot af bíl á vinnutíma. Jón Gnarr þarf "að kynna sér málið" eins og flest sem hann er spurður út í. Sem að vísu er virðingarvert að segja ekki bull um mál sem hann hefur ekki vit á.

Ég held að þetta sé eins og þegar hópur stjórnmálamanna þiggur stóra styrki frá fyrirtækjum að þá segir kona af sér en karlarnir sitja sem fastast. Og konur sem eiga eiginmenn sem hafa verið í stórviðskiptum víkja.

Mér fannst að vísu óþolandi og varð fyrir stórum vonbrigðum þegar ég frétti að Steinunn Valdís Óskarsdóttir, fv. borgarstjóri, hefði þegið stóra styrki frá Landsbankanum og fleirum - en ég skildi heldur ekki hvers vegna Hjálmar Sveinsson tók málið sérstaklega upp tveimur dögum fyrir kosningar. Nema hann hafi viljað gulltryggja að Samfylkingin missti eitt sæti borgarfulltrúa, sætið sem hann var í sjálfur, því að í leiðinni varð hann að útskýra hvers vegna Dagur, sem þáði margar milljónir, ætti ekki að víkja. En eins og alltaf þá minni ég á að það er Guðlaugur Þ. Þórðarson sem er styrkjakóngurinn og ætlar ekki að víkja. Og Sigurður Kári ætlar ekki að segja frá því í boði hverra hann situr á þinginu.

Leysir gefins hrefnukjöt vandann?

Smáfrétt í Fréttablaðinu í dag á síðu 2 þar sem sagt er frá því að mæðrastyrksnefnd hafi verið gefin 800 kg af hrefnukjöti vakti athygli mína: Er hér búið að leysa annars vegar vanda heimilanna um gefins mat og hins vegar ímyndarvanda hvalveiðanna? Gefandinn, hrefnuveiðimaðurinn, tekur nefnilega fram að það sé hluti af tilgangi gjafarinnar að vekja athygli á hvölum sem matarkistu og að "enginn þurfi að svelta ef hann ber sig eftir björginni".

Sökkva í skuldafen