Hagræðing í heilbrigðisþjónustu?

Ég er núna að hlusta á ráðgjafa heilbrigðisráðherra, eins og Guðjón Magnússon prófessor var kynntur. Eitt af því sem hann sagði var að of margar skurðstofur gætu skapað óöryggi, þar væru of fáar aðgerðir, eða eitthvað í þeim dúr, þess vegna mætti setja til dæmis allar meltingarsjúkdómaðgerðir á einn stað. En hvernig er það, eru ekki einkalæknastöðvarnar að koma upp eigin skurðstofum utan spítalanna? Einnig hélt Guðjón því fram að sameining heilbrigðisþjónustu á Norðurlandi í eina stofnun færði ákvarðanatöku nær fólkinu! Ég skil ekki hvernig þess háttar er haldið fram - yfirstjórn stofnananna verður einmitt færð úr héraði.

Engin áhrif haft á ráðuneytið

Athugasemdir

[Friðrik Dagur Arnarson 16.1.2009 kl. 16:51]

Sæll félagi. Er það ekki bara þannig að menn blaðra útí eitt og treysta því sem Göbbels sagði, að það þurfi bara að endurtaka eitthvað nógu oft þá fari allir að trúa því. Auðvitað er verið að skerða stórlega nærþjónustu og ákvarðanatöku á heimaslóðum. Það er, eins og jafnan  hjá þessari ríkisstjórn, verið að horfa á peninga en ekki að það er fólk á bak við hagtölur, úr holdi og blóði og með tilfinningar og þarfir. Það er líka verið að vinna á afmörkuðu sviði án tillits til þess hvaða áhrif það hefur á önnur mál. Þetta er t.d. aðför að byggð og búsetu úti um land. Þjónusta mun versna, vegalengdir að henni munu aukast og þar með versnar aðgengi og öryggi. Hlutur fólks utan helstu þéttbýliskjarnanna mun því enn versna í samanburði við þéttbýlið, sem síðan ýtir undir áframhaldandi samdrátt þar. Ekki stuðlar þetta að endurnýjun starfa í landbúnaði eða eykur löngun manna til að flytja í dreifbýli. Það er ekki horft á heildarmyndina. Nema það sé verið að flæma fólk utan af landi svo það komi í öll tómu húsin á höfuðborgarsvæðinu sem verktakar sem eru duglegir að borga í flokkssjóði eru búnir að byggja. Það er kannski málið.

[Ingólfur Ásgeir Jóhannesson, 17.1.2009 kl. 11:50]

Sæll Diddi og takk fyrir hugleiðingarnar, það er einmitt mikilvægt að huga að afleiðingunum í dreifbýli. En það eru ekki nógu gott ástand heilbrigðisþjónustu á höfuðborgarsvæðisins þar sem heilsugæslustöðvarnar eru ekki efldar nægilega en sérfræðingarnir starfa úti í bæ en ekki á heilsugæslustöðvunum.

[Friðrik Dagur Arnarson 17.1.2009 kl. 13:45]

Ég er líka hugsi yfir stöðunni í þéttbýli. Það er fullyrt í mín eyru að læknar taki ýmsar aðgerðir sem gefa góðar tekjur til sín á einkastofur úti í bæ, en láti það sem er dýrt og erfitt eftir handa spítölunum. Þar með flytjast fjármunir af sjúkrahúsunum yfir í einkageirann svo rekstur þeirra verður erfiðari. Ekki hef ég séð orð um að eitthvað eigi að skoða þessa hluti og reyna að spara þarna. En ráðherrann verður varla í vandræðum með að skera þarna niður, hann hefur jú ekki áhuga á einkavæðingu, ekki satt.