Tilnefning til bókmenntaverðlauna

Fyrir fáeinum dögum kom út mikið rit, Almenningsfræðsla á Íslandi 1880-2007, sem er í tveimur bindum. Ritið var samið að tilhlutan Kennaraháskóla Íslands en gefið út af Háskólaútgáfunni. Þrjár háskólastofnanir áttu formlegt samstarf við KHÍ um aðild að verkinu: félagsvísindadeild Háskóla Íslands, kennaradeild Háskólans á Akureyri og Sagnfræðistofnun Háskóla Íslands.

Í tilefni af útkomu þessa rits og þeirri staðreynd að ritstjóri þess, Loftur Guttormsson, prófessor emeritus við Háskóla Íslands, hefur verið tilnefndur til hinna íslensku bókmenntaverðlauna 2008 í flokki fræðirita, ákváðum við sem vinnum við Háskólann á Akureyri og áttum þátt í að þetta ritverk varð að veruleika að koma með eitthvað „með kaffinu" í gærmorgun. Hlutur HA í ritinu er sá að Bragi Guðmundsson prófessor sat í ritnefnd, Rósa Eggertsdóttir sérfræðingur og Rúnar Sigþórsson dósent skrifuðu saman kafla um skólaþróun og skólamenningu og sá sem hér bloggar skrifaði tvo kafla, annan um aðalnámskrána 1976-1977 og þau tímamót sem hún markaði með innleiðingu nútímalegra vinnubragða við námskrárgerð og áherslu á margvíslegar gerðir kennslufræða, hinn um átök um menntaumbætur í kjölfar aðalnámskrárinnar. Ég hvet allt áhugafólk um skólamál sem fagfólk til að kynna sér þetta mikla rit.

Athugasemdir

[Kristín Dýrfjörð, 11.12.2008 kl. 01:48]

Ég er viss um að þetta hefur verið skemmtilegt morgunkaffi, sé til hvort ég líti inn í morgunkaffi í næstu viku. Verð fyrir norðan á mánudag og þriðjudag.

[Ingólfur Ásgeir Jóhannesson, 11.12.2008 kl. 14:53]

Þetta var ágætis morgunkaffi - og svo var átinu haldið áfram í hádeginu í nú árlegum jólamat hjá Friðriki og Öddu. Eina sem á vantaði að við fengum ekki að vita hvar berin í rifsberjasultuna (sem við fengum ekki í þetta skipti) voru tínd, hvort það var í réttum garði eða í garði einhvers í óleyfi. Maturinn var held ég allur norðlenskur nema laxinn sem Kristján Þór Júlíusson veiddi í Eystri-Rangá!