Fuglasafn Sigurgeirs í Mývatnssveit

Á sunnudaginn heimsótti ég Fuglasafn Sigurgeirs Stefánssonar í Ytri-Neslöndum í Mývatnssveit sem opnað hafði verið viku áður í stórglæsilegu nýju húsi á bakka Mývatns rétt við bæinn. Geiri í Neslöndum byrjaði ungur að safna eggjum og síðar lét stoppa upp fugla og kom upp stóru safni í litlum skúr sem margir fengu að skoða, heimsótti ég safnið sumarið 1998, sem reyndist eitt af síðustu skiptunum sem ég hitti Sigurgeir því að hann fórst í slysi á Mývatni haustið 1999. Sigurgeir hafði þá eignast eintök af nær öllum fuglum Íslands, auk margra erlendra fugla og tveggja af sumum tegundum.

Fjölskylda hans og vinir hafa nú látið rætast þann draum Sigurgeirs að koma safninu fyrir í góðum húsakynnum. Og það eru heldur betur húsakynnin, skal ég segja ykkur. Manfreð Vilhjálmsson arkitekt sem líka teiknaði Stórutjarnaskóla og Þjóðarbókhlöðuna, ef ég veit rétt, teiknaði hús sem mjög lítið ber á á vatnsbakkanum, en þegar inn er komið, er þar glergluggi með stórkostlegu útsýni út Neslandavíkina og fuglalífið þar. Safnið sjálft er í myrkvuðu rými, eins konar helli, og nýtur sín afar vel. Eitt af innri einkennum hússins er vatnsgjá, þema tekið úr náttúru Mývatns; hún liggur í geisla innan úr fuglasafnshellinum út á stétt vatnsmegin hússins. Stórglæsileg hugmynd. Við hlið safnsins er minna hús sem hýsir frægan bát sem var notaður til flutninga á Mývatni, bæði á fólki og varningi, skilst mér. Í Fuglasafninu er líka hægt að njóta veitinga og það er hægt að detta í vatnsgjána góðu sem að vísu er afar grunn.

Athugasemdir

[Margrét Ingibjörg Lindquist, 26.8.2008 kl. 16:18]

já ... Hann Geira var einstakur maður ... ég man vel eftir honum þegar ég vann uppí Mývatnveit sem unglingur... hann var vanur að keyra okkur á böll á stóra Bláa trukkinum... frábært að sjá að safnið hans er komið í svona stórglæsilegt húsnæði...

[Gísli Baldvinsson 27.8.2008 kl. 10:58]

Vonandi verður svo hægt að kom upp heilstæðu náttúrugripasafni á Akureyri. Þetta er að verða til skammar hér í bæ.

[Ingólfur Ásgeir Jóhannesson, 27.8.2008 kl. 11:52]

Margrét og Gísli: Kærar þakkir fyrir innlitið.

[Dettifoss Bergmann 28.8.2008 kl. 21:16]

Það er vonandi að ég komst í Sveitina í október, vonandi næ ég að skoða safnið þá.

Þetta er góður minnisvarði um góðan dreng.