Neitað um samningsrétt og félagafrelsi

Prófessorar í íslenskum ríkisháskólum hafa nú sameinast í einu félagi sem vill fá að semja um kaup og kjör við ríkið. Þetta gerðist eftir að kjararáð ákvað um síðustu áramót að það væri ekki hlutverk þess að ákveða kaup og kjör prófessora. Lengst af voru prófessorar í sama stéttarfélagi og aðrir háskólakennarar, einu félagi í hverjum háskóla, en skömmu fyrir árið 2000 breyttist það þannig að samningsréttur var tekinn af prófessorum og falinn í hendur kjaranefnd. Þá stofnuðu prófessorar annars vegar félag við Háskóla Íslands og hins vegar í öðrum ríkisháskólum.

Eftir ákvörðun kjararáðs um áramótin ákváðu prófessorar að sameinast í einu félagi, Félagi prófessora í ríkisháskólum, og óska eftir því að fjármálaráðherra semdi við félagið fyrir okkar hönd. Fjármálaráðherra hefur nú hafnað því við fáum samningsrétt fyrir okkar félag; því mun hann væntanlega ætla að ákveða sjálfur upp á sitt eindæmi hvað við fáum í kaup og kjör í stað þess að semja við okkur eins og aðra starfsmenn ríkisins. Væntanlega þarf að fara dómstólaleið til að fá úr því skorið hvort okkur er heimilt að vera í félagi með samningsrétti.

E.t.v. telur fjármálaráðherra að við eigum að vera í félagi með öðrum háskólakennurum. Það er gilt sjónarmið og ég hef ekkert á móti því fyrir mitt leyti að vera í Félagi háskólakennara á Akureyri sem ég var í fyrir nokkrum árum áður en ég færðist í starf prófessors. Þetta hafa hins vegar prófessorar rætt í þaula og komist að þeirri niðurstöðu að stofna sérstakt félag til að gæta hagsmuna sinna. Af hverju virðir fjármálaráðherra ekki þá ákvörðun?

Athugasemdir

[Halla Rut , 26.7.2007 kl. 02:54]

Það er þitt val að ákveða í hvaða félagi þú ert í. Þú getur verið einn í þínu eigin félagi ef þú vilt. Er það ekki lýðræði. Ríkinu er svo sjálfvalið hvernig það semur við þig eða ykkur. Hins vegar eins mikið og ég virði lýðræði og sjálfstæði þá þoli ég ekki einokun og kúgun svo farið varlega. Sanngirni er það sem gera skal og hafið það að leiðarljósi. Eða eins og Skoskt réttarkerfi segir "true and fair".

[Ingólfur Ásgeir Jóhannesson, 27.7.2007 kl. 09:33]

Ég vil einmitt ekki vera einn í félagi heldur með öðrum. Ég get ekki séð að það sé lýðræðislegt eða ríkið hafi rétt til þess að neita félagi sem vill vera stéttarfélag um það, einkanlega þegar í því eru velflestir í því starfi. En sem betur fer er til sérstakur Félagsdómstóll sem tekur á þessu máli.