Nýliðar í grunnskólakennslu og kynjasjónarhorn

Tvær rannsóknir voru gerðar á árunum 2017–2023 til að kanna hvernig nýbrautskráðum kennurum vegnaði í starfi og hvort og hvers konar áhrif kyn hefði. Sú fyrri var gerð með viðtölum við nýja kennslukarla og hin síðari með viðtölum við kvenkyns nýliða.

• Báðar byggðar á raðviðtölum sem stóðu í tvö ár við hvern viðmælanda. Samtals var rætt við átta karla og ellefu konur í rannsóknunum.
• Gögnum var safnað á árunum 2017–2020 í karlarannsókninni og 2021–2023 í kvennarannsókninni.
• Ingólfur Ásgeir Jóhannesson stýrði rannsóknunum í samstarfi við fjóra aðra rannsakendur, það er einn lektor á Menntavísindasviði og þrjá grunnskólakennara. Tveir grunnskólakennaranna voru meistaranemar þegar þeir hófu þátttöku í rannsóknarverkefnunum og skrifuðu meistaraprófsritgerð með hliðsjón af hluta gagnanna.
• Skrifaðar hafa verið fimm fræðigreinar og unnið er að minnsta kosti einni grein til viðbótar.
• Ekki var um skipulagðan samanburð á hópunum tveimur að ræða. Þeir voru ólíkir – ekki bara kynið – heldur líka þannig að flestir karlarnir kenndu í 8.–10. bekk og flestar konurnar á yngsta stigi og miðstigi. Samanburður sem væri hægt að gera yrði því stundum samanburður á kennslu á ólíkum aldursstigum. Þá voru flestir viðmælendur í kvennarannsókninni komnir með eins til þriggja ára starfsreynslu eftir að kennaraprófi lauk, og setti það svip á niðurstöðurnar, en karlarnir nýliðar þótt sumir þeirra hefðu kennt annars staðar með náminu.

Hér má sjá skrá um ritgerðir og ritrýndar greinar: https://uni.hi.is/ingo/2025/01/20/nylidar-i-grunnskolakennslu-og-kynjasjonarhorn/

Nýlega var haldið málþing og hér upptaka frá því: https://vimeo.com/1073486827?share=copy#t=0

Hlaðvarp:

Menntavísindavarpið í október 2014 - https://open.spotify.com/episode/4qkC9nNMlm6CSigocSxHux

Athugasemdir

[Hilmar Hafsteinsson 19.6.2025 kl. 09:17]

Með fullri virðingu. Það færi betur ef þeir sem tjá sig um íslensk menntamál reyndu að gera það á íslensku.

Orðskrípið „kennslukarlar” er óhæfa úr smiðju HÍ Hí hí leikskólaakademíunnar. Á Íslandi starfa karlkennarar og þónokkrir kvenkennarar. Kynin eru ekki fleiri en tvö.

[Ingólfur Ásgeir Jóhannesson, 20.6.2025 kl. 13:52]

Þetta er mjög slök athugasemd hjá þér, Hilmar. Það er ekki stakt orð á öðru máli en íslensku í minni færslu og orðið kennslukarl notaði ég fyrstur en ekki „leikskólaakademía“. (Nema þú getir sýnt mér að einhver annar en ég hafi notað orðið fyrir árið 2000.)