Geta grasafræðiteikningar verið listaverk?

Ég hef fylgst með fáránlegri deilu um hvort hafi verið rétt af útgefanda bókar með teikningum Eggerts Péturssonar að krefjast þess að það að drullumalla eintak af bókinni og sýna það sem listaverk annars fólks væri brot á sæmdarrétti höfunda. Hef verið þeirrar skoðunar að útgefandi og höfundur hafi dregið óþarfa athygli að drullumölluninni og e.t.v. gert það að því "verki" (eða gjörningi - ég læt listgildið algerlega liggja milli hluta, plagar mig hvorki til né frá) sem það hlýtur að vera orðið núna.

Ég fylgdist svo höfundi "nýja verksins" í Kastljósinu í gærkvöldi kalla verk Eggerts grasafræðiteikningar og þess vegna líklega engin listaverk. Ég man til þess að ég hreifst af teikningum Eggerts á sínum en tókst aldrei að "nota" þær til að þekkja í sundur jurtir. Þetta var löngu áður en Eggert varð jafnþekktur fyrir málverk sín og hann er í dag. En skyldi Hannesi Lárussyni, sem var langt frá að vera auðmjúkur eða hógvær í Kastljósinu, hafa tekist það?

Athugasemdir

[Gunnar Th. Gunnarsson, 1.5.2011 kl. 10:55]

Svar; já, alveg eins og teikningar Halldórs Péturssonar af dýrum voru listaverk.

[Emil Hannes Valgeirsson, 1.5.2011 kl. 11:42]

Þessi deila snýst um meðal annars um skilgreiningu á því hvað sé list. Listamenn í dag skilgreina þetta gjarnan þannig að það sem gert er í listrænum tilgangi sé list sama hvernig útkoman er. Þess vegna eru myndskreytingar í bókum og allskonar hönnun, ekki list eða allavega ekki á sama stalli og það sem gert er í hreinum listrænum tilgangi.

[Ingólfur Ásgeir Jóhannesson, 1.5.2011 kl. 12:02]

Vissulega snýst deilan að hluta um hvað er list - en lagalegan deilan er um sæmdarrétt og hvað hver og einn megi geri við verk (list eða ekki list) einhvers annars. Í þeim skilningi skiptir það engu máli hvort teikningar Eggerts eru grasafræði eða myndlist.

Ég hef ætíð verið mjög hrifinn af teikningum Eggerts sem fallegum (og listrænum verkum) þótt ég hafi ekki getað nýtt mér grasafræðibók kollega míns og samkennara Ágústs sem skyldi..

Orðið list hefur siðferðilega vídd sem truflar okkur í umræðum um þetta.

[Emil Hannes Valgeirsson, 1.5.2011 kl. 12:40]

Orginal grasafræðiteikningar Eggerts sem notaðar voru í bókinni eru auðvitað óskemmdar og varla dettur nokkrum í hug að eyðileggja þær hvort sem þær eru listaverk eða ekki. En það er verra ef þær nýtast ekki alltaf til að þekkja í sundur plöntur, því það er aðaltilgangurinn með þeim.

Eggert er flinkur teiknari og var þess vegna fenginn til verksins á sínum tíma. Þær myndir hafa væntanlega verið kveikjan að þeim málverkum sem hann er þekktur fyrir í dag en þau verk eru gerð í hreinum listrænum tilgangi og eru óumdeild listaverk.

Orginal listaverkum mega ekki aðrir breyta án leyfis en spurningin er hversu langt sæmdarrétturinn nær. Nær hann yfir keypt eintök af prentaðri bók?