Vatnið sem oftast er myndað undir röngu nafni?

Hvaða stöðuvatn er á myndinni? Sennilega eitt af mest mynduðu vötnum landsins - en næstum aldrei með réttu nafni heldur er það sagt vera stærra og miklu frægara nágrannavatn þess. Ein þekktasta myndin er af kúnum hans Óla, notuð til að selja ost; hún var til skamms tíma í Leifsstöð, og er kannski enn. Þessa fallegu mynd tók Eygló Björnsdóttir fyrir fáeinum misserum.

Vatnið, sem kennt er við litla eyju í vatninu, er rétt hjá einu af frægustu vötnum landsins. Úr því rennur stuttur lækur út í hitt vatnið. Það er ekki mikill straumur í vatninu og minnkaði þegar virkjunarfyrirtæki sem er núna hluti af Landsvirkjun hækkaði yfirborð nágrannavatnsins fyrir nokkrum áratugum. Nýlega sýnist okkur straumurinn í læknum hafa aukist eftir að lokað var skurðum í nærliggjandi votlendi.

Bæði vötnin eru friðlýst með sérstökum lögum, ásamt votlendinu þar í kring og víðáttumiklu vatnsverndarsvæði sem nær inn á öræfin. Vötnin og votlendið eru líka á svokallaðri Ramsarskrá um mikilvæga votlendisstaði ásamt milli 1000 og 2000 öðrum stöðum í heiminum.

Hvað heitir vatnið? Og hvað heitir stóra nágrannavatnið?

Athugasemdir

[Eygló 20.11.2007 kl. 12:43]

Má ég taka þátt??  
Ég giska á Stakhólstjörn fyrir vatnið og veit hvert stóra nágrannavatnið er en ljóstra því ekki upp að svo stöddu....svo fleiri geti komið með tillögu 

Hvað er annars í verðlaun???

[Sigurður M Grétarsson, 20.11.2007 kl. 15:04]

Ég giska á að þetta sé Úlfljótsvatn og að stóra nágrannavatnið sé Þingvallavatn.

[Ingólfur Ásgeir Jóhannesson, 20.11.2007 kl. 15:26]

Eygló hefur rétt fyrir sér um nafn vatnsins en ég þakka þér, Eygló, fyrir að ljóstra ekki upp leyndóinu alveg strax.

Var ekkert búinn að hugsa um verðlaun. Ætli ég geymi þau ekki bara fram að tuttuguþúsundustu flettingunni

[Eygló 20.11.2007 kl. 16:17]

Eru ekki flettingarnar nú þegar orðnar 21697...? Það sýnist mér.....
Þannig að sú krítería gengur ekki upp!!

[Ingólfur Ásgeir Jóhannesson, 20.11.2007 kl. 16:59]

Eygló mín, auðvitað 25 þúsundasta flettingin, þakka þér fyrir að hjálpa mér að telja!

[Eygló 20.11.2007 kl. 19:37]

Æ, já.... réttir maður ekki vinum sínum hjálparhönd ef maður getur...

[Ingólfur Ásgeir Jóhannesson, 23.11.2007 kl. 20:12]

Hárrétt, Þorvaldur! Það er Mývatn