Námsstefna um jafnréttisfræðslu

Námsstefna um jafnréttisfræðslu í leik- og grunnskólum verður þriðjudaginn 26. maí kl. 13:30 í Salnum í Kópavogi. Í auglýsingu frá verkefninu segir: Þróunarverkefnið Jafnréttisfræðsla í leik- og grunnskólum er samstarfsverkefni Jafnréttisstofu, Félags- og tryggingamálaráðuneytisins, Hafnarfjarðarbæjar, Reykjavíkurborgar, Akureyrarbæjar, Kópavogsbæjar og Mosfellsbæjar. Menntamálaráðuneytið styður verkefnið og leggur framkvæmd þess lið ásamt Jafnréttisráði og fjölmörgum styrktaraðilum. Þátttökusveitarfélögin fimm tilnefndu öll einn leikskóla og einn grunnskóla til að sinna tilraunaverkefnum á sviði jafnréttismála skólaárið 2008–2009. Á námsstefnunni kynna fulltrúar skólanna verkefni sem nýst geta til jafnréttisstarfs í skólum. Nánari upplýsingar um þróunarverkefnið má finna á slóðinni www.jafnrettiiskolum.is

Dagskrá - uppfærð

13:30 - 13:45 Tónlistaratriði frá leikskólanum Hörðuvöllum í Hafnarfirði

13:45 - 14:00 Árni Páll Árnason félags- og tryggingamálaráðherra setur námsstefnuna

14:00 - 14:15 Louise Windfeldt, höfundur barnabókarinnar Den dag da Rikke var Rasmus og Den dag da Frederik var Frida kynnir bókina og tilurð hennar

14:15 - 15:10 Kynningar á jafnréttisstarfi í leikskólum

15:10 - 15:40 Kaffihlé / kynningarbásar og veggspjöld

15:40 - 16:30 Kynningar á jafnréttisstarfi í grunnskólum

16:30 - 16:45 Ingólfur Ásgeir Jóhannesson prófessor fer yfir niðurstöður faghóps verkefnisins

16:45 - 17:00 Kristín Ástgeirsdóttir slítur námsstefnunni og veitir viðurkenningar fyrir teikni- og ljóðasamkeppni Jafnréttisstofu og Eymundsson

Námsstefnan er kjörinn vettvangur fyrir alla þá sem vilja fræðast um jafnrétti í skólastarfi. Hún er öllum opin og eru skólastjórnendur, kennarar, foreldrar, fulltrúar fræðslunefnda, fulltrúar jafnréttisnefnda, starfsmenn skólaskrifstofa, sveitarstjórnarmenn og stjórnmálamenn sérstaklega hvattir til að mæta. Vinsamlegast tilkynnið þátttöku til Arnfríðar Aðalsteinsdóttur verkefnisstjóra á Jafnréttisstofu sem einnig veitir frekari upplýsingar [e-mail] / sími 460-6200.

 

Athugasemdir

[Jóhannes Ragnarsson, 23.5.2009 kl. 10:20]

Vel til fundið að halda svona námsstefnu um jafnrétti verkafólks gagnvart yfirstéttinni og efri-millistéttinni.

[Ingólfur Ásgeir Jóhannesson, 23.5.2009 kl. 11:17]

Takk fyrir innlitið, Jóhannes, segðu mér endilega meira af þessari ráðstefnu sem þú ætlar að halda um jafnrétti stétta.

[Ólafur Þórisson, 23.5.2009 kl. 13:20]

Komdu sæll Ingólfur Ásgeir.

Það er ein grundvallrspurning varðandi jafnrétti allra, þar með talið grundvallarréttinn og þar með grundvallarmannréttindi til lífsins. Þessi spurning er lögð hér fram í fyllstu vinsemd: Er ekki lögð áhersla á það, á viðkomandi námsstefnu, að jafnréttið undanskilji engan, þar með talið hið ófædda barn?

Reykjavík 23. maí 2009,

Með bestu kveðjum, og óskum um Guðs blessun,

Ólafur Þórisson, guðfræðikandídat.

[Ingólfur Ásgeir Jóhannesson, 23.5.2009 kl. 13:53]

Sæll Ólafur og þakka þér innlitið.

Ráðstefnan er um jafnréttisfræðslu í leik- og grunnskólum en nær ekki sérstaklega til fræðslu fyrir ófædd börn. Eflaust er ekki síður þörf á því að hugsa til hvort foreldrar, eldri systkini, afar og ömmur mismuna ófæddum börnum, ef þau á annað borð vita kyngervi þess, t.d. með því að kaupa ungbarnaföt í "stelpulitum" og "strákalitum". Eða spili "stráka-" eða "stelputónlist" fyrir þau.

Sumir foreldrar óska því sérstaklega eftir því að fá alls ekki að vita kyn eða hugsanlega fötlun hins ófædda barns í þeim anda að öll börn séu jafnvelkomin í heiminn.