Heræfingar NATO og vopn til Sádi-Arabíu og Ísraels

Nú berast fréttir af heræfingum NATÓ hér á landi. Samtök herstöðvaandstæðinga hafa ályktað gegn heræfingunum sem eru ekki líklegar til að auka frið í heiminum, eða til hvers æfa herir sig? Aftur á móti get ég ekki að því gert að mér ofurlítið fyndið að heyra um að það eigi að gefa liðinu að borða sem vissulega er liður í íslenskri gestrisni sem hingað til hefur ekki verið viðhöfð gagnvart erlendu herliði.

Í gær komu líka fréttir af aukinni vopnasölu og hernaðarlegum Bandaríkjanna til Sádi-Arabíu og Ísraels - til mótvægis við uppgang Írans. Hér eru einræðisríki og ofbeldisríki studd. Á það að auka frið í heiminum?

 

NATO ákveður eftirlit

Athugasemdir

[Björn Heiðdal, 29.7.2007 kl. 10:30]

Ég tek undir orð Skúla, þó ég tali ekki fyrir hans hönd, að íslenskur stórher væri gott fyrir land og þjóð.  Íslensk ungmenni þurfa að kynnast heraga til að draga úr umferðarhraða og lögleysu.  Svo er íslenskur her góður starfsvettvangur fyrir "kristileg" gamalmenni með stríðsdellu.     

[Jón Valur Jensson, 30.7.2007 kl. 00:19]

Tek undir orð Skúla -- og Björns um sjóherinn. Við eigum ekki að reiða okkur mjög á Norðmenn, sem eru viðsjálir og hugsa fyrst og fremst um eigin hag, heldur efla Landhelgisgæzluna stórlega.

Ingólfur mælir gegn "heræfingunum sem eru ekki líklegar til að auka frið í heiminum, eða til hvers æfa herir sig?" segir hann. Undarlega spurt. Til hvers æfir norski herinn sig, til hvers sá sænski og sá finnski? Til að draga úr friðarlíkum í heiminum? Fjarri fer því, heldur til að tryggja stöðugleika á svæðinu, sjá til þess, að þar myndist ekki tómarúm sem auðvelt er að fylla, þegar jafnvel enginn á þess von. Það er líka of seint að mynda her, þegar hættuástand er komið upp. Og um Ísland gildir alveg sama lögmálið og í Skandinavíu; ef eitthvað er, erum við berskjaldaðri en frændur okkar. Vinstrimenn þurfa að hætta að hugsa um varnarmálin í gömlu hjólförunum. Vonandi er sú skynjun mín rétt, að einhver skilningur sé að aukast á þessu í Samfylkingunni upp á síðkastið.

En Ingólfur heldur áfram: "Aftur á móti get ég ekki að því gert að mér ofurlítið fyndið að heyra um að það eigi að gefa liðinu að borða sem vissulega er liður í íslenskri gestrisni sem hingað til hefur ekki verið viðhöfð gagnvart erlendu herliði." -- Það er ekkert "fyndið", að við tökum þátt í kostnaðinum við herfæfinguna, heldur sjálfsagt mál, og í einhverju formi verður það að vera. Við megum blygðast okkar fyrir að hafa hingað til fremur reynt að græða á erlendum varnarher á Íslandi en að taka þátt í kostnaði hans. Útgjöld til varnarmála á fjárlögum landsins eru komin til að vera, hvað sem Samtök herstöðvaandstæðinga gaspra í þeim efnum.

[svarta, 30.7.2007 kl. 18:21]

Sá auglýsingu í sjónvarpinu um daginn. Þar sem herstöðvaandstæðingur var á leið í mótmælagöngu - Herinn burt! Alveg frábær auglýsing.

[Ingólfur Ásgeir Jóhannesson, 31.7.2007 kl. 10:35]

Ég þakka höf. athugasemda kurteislegar umræður. Ég held reyndar að allir þurfi að fara upp úr hjólförum í sambandi við varnar- og öryggismál, ekki bara vinstri menn. NATÓ var stofnað á tímum kalda stríðsins og þeir sem réðu ferðinni á Íslandi gengu í það með látum. Þótt ég sé í stjórnmálaflokki tala ég að vísu ekki fyrir neina aðra en mig sjálfa í því efni að það þarf gagngert mat á öryggismálum þar sem mér sýnist að stjórnvöld hafi sofið á verðinum áður en bandaríski herinn fór, a.m.k. varð uppi fótur og fit út af þyrluleysinu. Mikilvægustu öryggismálin innanlands eru björgunarstarf þar sem byggt er á sjálfboðastarfi björgunarsveita, gjarna í ungmennafélagsanda því eðli máls skv. eru þær hlutfallslega fjölmennari í dreifbýlinu. Í þeim efnum á hernaðarþjálfun ekki við.