Of langt á kjörstað?

Ég heyrði mjög leiðinlega frétt í dag um að það væri fólk sem væri í rauninni svipt kosningarétti með því að hafa aðeins einn kjörstað í öðrum enda gríðarstórs sveitarfélags. Þannig t.d. fólkið á Jökuldal þyrfti niður í Fellabæ - og ég býst við að með þessu séu þeir sem búa í langstærsta þéttbýliskjarnanum á Héraði, Egilsstöðum, líka hálfpartinn sviptir þeim möguleika að ganga til kjörstaðarins. Fyrir sveitafólkið, þá er byrjaður sauðburður og því getur ekki öll fjölskyldan farið í einu því að það þarf að sinna burðinum. Kosningar hér áður fyrr voru í júní en ekki á sauðburði. Svo ættum við kannski að kjósa fyrr á vorin áður en fólk leggst í ferðalög. Hef reyndar heyrt þetta á fleirum sem eiga langt í kjörstað að það er bara kosið á þéttbýlisstað í öðrum enda sveitarfélagsins. Það þarf að taka það mál rækilega til skoðunar. Kannski ætti að taka upp póstkosningar og skyldu til að kjósa eins og Ástralir sem sekta fólk fyrir að kjósa ekki (leyfa að vísu afsökunarbréf til að losna við sektina).

Á Akureyri kvartar svo fólk undan umferðaröngþveiti við kjörstaðinn; ég hef aldrei ekið hér á kjörstað svo ég veit ekkert um það. Kjörstaðurinn er á gamla vinnustaðnum mínum í Oddeyrarskóla frá 1975-1976. Mér finnst það svolítið flott - stofan sem kjördeildin mín er í var þó ekki til þá.

Athugasemdir

[Ragnar Bjarnason, 12.5.2007 kl. 20:09]

Sæll Ingólfur. Ég tel þetta full langt seilst að tala um sviptingu kosningaréttar. Auðveldlega er hægt að benda á utankjörfundaatkvæðagreiðslu í þessu sambandi til dæmis en hún stendur yfir í langan tíma og mjög líklegt að fólk á svæðinu geti kosið á þann hátt í tilfallandi ferðum á þeim tíma. Samgöngur í dag eru allt aðrar en fyrr og þetta með fríin að því er nú bara orðið þannig farið að Íslendingar eru farnir að taka frí allan ársins hring.

[Pétur Björgvin, 12.5.2007 kl. 21:24]

Þetta er jafnréttismál, það á ekki að vera margfalt erfiðara fyrir mig að skila atkvæði mínu heldur en einhvern annan með sama atvæðisrétt. Og þar breytir utankjörfundaatkvæðagreiðsla engu, það er jafn langt að komast á staðinn og ekkert sem réttlætir að ætla að ég þurfi í þéttbýlið. Lítið mál væri að keyra á sérinnréttaðri rútu um dreifbýlustu svæði landsins og stoppa á ákveðnum stöðum og opna kjörstað þar í klukkustund.

[Gísli 12.5.2007 kl. 23:07]

Talandi um fólk sem býr í hinum dreifðu byggðum landsins, þá velur fólk sér bústað með þeim kostum og göllum sem því fylgir.Það er langt í kjörstað, það er langt í verslun, og það er langt í flesta þjónustu. Á síðustu árum hefur þónusta við fólk sem svona býr farið minnkandi, t.d. eru mjólkurbílar hættir að taka sendingar til bænda frá verslunum í þéttbýlisstöðum. Reyndar hefur póstþjónustan að ég best veit batnað þannig að pósti er dreift nánast daglega.

[Ingólfur Ásgeir Jóhannesson, 13.5.2007 kl. 08:21]

Sælir, piltar, þakka ykkur athugasemdirnar. Ég veit ekki hvort fólkinu í dreifbýlinu í sveitarfélaginu Fljótsdalshéraði var ráðlagt það sem þú bendir á, Ragnar. Held að það sé ætlast til þess að ef þú ert heima á kjördag greiðir þú atkvæði á kjörfundi, en reyndar segir lagatextinn aðeins "sem ekki getur sótt kjörfund á kjördegi" (Lög um kosningar til Alþingis, 56. gr.). Það er líka fyrirhöfn að koma sér í utankjörfundaratkvæðagreiðsluna fyrir margt fólk. Mér gest að því að prufa hugmyndir Péturs.

[Eygló 13.5.2007 kl. 18:55]

Ég held þeir ættu nú að fara að koma þessum kosningamálum í þann farveg að hægt sé að kjósa rafrænt á netinu (fyrir þá sem það kjósa) svo fólk þurfi ekki að vera að æða út um allar tær og trissur oft um langan veg til þess eins að kjósa.